LEWIS, CHARLES PRYTHERCH (1853 - 1923), mabolgampwr amryddawn

Ganwyd 20 Awst 1853 yn fab i Frederick Lewis, Llwyncelyn, Llanwrda (Caerfyrddin), ac addysgwyd yn Ysgol Llanymddyfri ac yng Ngholeg Iesu, Rhydychen. Graddiodd yn 1876, a bu'n athro yn ei hen ysgol am flynyddoedd lawer. Ond mewn chwaraeon yr enillodd enw yn Rhydychen; yr oedd yn ' triple Blue ' yno, oblegid cynrychiolodd ei brifysgol yn y ras glwydydd (hurdle race), yn bwrw'r morthwyl, ac ar y maes criced. Cafodd gynnig unwaith i chwarae dros y M.C.C. yn Awstralia, ond ni allai fynd. Heblaw hyn oll, yr oedd yn gefnwr da ar y maes Rygbi, a bu'n cynrychioli Cymru bump o weithiau rhwng 1882 a 1884. Yn ddiweddarach, troes ei gefn ar waith ysgol a mynd yn gyfreithiwr, a daeth yn ŵr amlwg (yn faer ddwywaith, ac yn ustus) ym mywyd cyhoeddus Llanymddyfri. Bu farw 27 Mai 1923.

Awdur

• Dr Moelwyn Idwal Williams

Ffynonellau

• Western Mail, 28 Mai 1923
• The Carmarthen Journal and South Wales Weekly Advertiser , 1 Mehefin 1923
• The Illustrated sporting and dramatic news a high-class weekly journal of sport, art, literature, music and the drama (Llundain 1874-1942), 2 Mehefin 1923
• The Weekly Mail, 3 Mehefin 1923

Darllen Pellach

• WalesOnline: The sporting great who became Wales' last line of defence
• Bob Harragan, Andrew Hignell, C.P. Lewis: the champion cricketer of South Wales (Cardiff 2009)
• David Smith, Gareth Williams, Fields of Praise. The official history of the Welsh Rugby Union 1881-1981 (Caerdydd 1980), t.41

Delweddau

• Getty Images: Charles Prytherch Lewis

Dolenni Ychwanegol

• VIAF: 108008630
• Wikidata: Q2959651

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/