LLOYD (neu LLOYDE), OLIVER (1570/1 - 1625), deon Henffordd

Ganwyd 1570 neu 1571; brodor o Sir Drefaldwyn, ac ewythr David Lloyd, deon Llanelwy. Ymaelododd yn Rhydychen, 25 Ionawr 1588/9, a daeth yn gymrawd o Coleg All Souls. Graddiodd yn B.C.L. yn 1597, a D.C.L. yn 1602, a gwnaed ef yn ddadleuydd y ' Doctors Commons ' yn 1609.

Nid yw'n amlwg pa bryd nac ymha le y cychwynnodd ei yrfa yn yr eglwys, ond cafodd ddyrchafiad buan ynddi. Yn 1615 gwnaed ef yn rheithor Clynnog Fawr, Sir Gaernarfon, canghellor Henffordd, a chanon Windsor, ac, yn 1617, yn ddeon Henffordd. Daliodd y swydd olaf hyd ei farw yn 1625. Yr oedd yn noddwr i Goleg Iesu, Rhydychen.

Y mae'r Oliver Lloyd hwn i'w wahaniaethu oddi wrth un arall o'r un enw, sef nai iddo a brawd i'r David Lloyd a enwyd uchod. Yr oedd yr Oliver Lloyd hwnnw hefyd yn gymrawd o Goleg All Souls ac yn ddoethur yn y gyfraith, a bu farw yn 1662.

Awdur

• John James Jones, (1892 - 1957)

Ffynonellau

• Foster, Alumni Oxonienses: the members of the University of Oxford
• Anthony Wood, Athenae Oxonienses (1813–20)

Dolenni Ychwanegol

• Wikidata: Q7087668

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/