LUCAS, RICHARD (1648 - 1715), clerigwr ac awdur

Ganwyd yn Llanandras, sir Faesyfed, yn fab i Richard Lucas. Addysgwyd ef yng Ngholeg Iesu, Rhydychen; graddiodd yn B.A. 1668, M.A. 1672, a bu'n gymrawd 1671-84. Wedi cymryd urddau bu'n feistr ysgol rad Abergafenni am lawer blwyddyn. Yn 1678 daeth yn rheithor eglwys Sant Steffan, Coleman Street, Llundain, ac yn 1683 yn ddarlithydd yn S. Olave, Southwark. Dyfarnwyd iddo radd D.D. yn 1691, ac yn 1697 apwyntiwyd ef yn brebendari Westminster. Collasai ei olwg cyn yr apwyntiad hwn. Enillodd Lucas fri fel pregethwr ac awdur. Cynnwys ei weithiau cyhoeddedig Enquiry after Happiness, 1685; Practical Christianity or an account of the Holiness which the Gospel enjoins, 1690; Christian Thoughts for every day in the week; The Plain Man's Guide to Heaven, 1692; The Morality of the Gospel; Influence of Conversation, 1707; The Duty of Servants, 1710. Hefyd cyfieithodd The Whole Duty of Man yn Lladin. Cyhoeddwyd nifer o gyfrolau o'i bregethau gan ei fab. Bu farw 29 Mehefin 1715, a chladdwyd ef yn abaty Westminster.

Awdur

• Griffith Milwyn Griffiths

Ffynonellau

• Oxford Dictionary of National Biography
• Foster, Alumni Oxonienses: the members of the University of Oxford
• Anthony Wood, Athenae Oxonienses (1813–20), iv, 722
• Josiah Thomas Jones, Geiriadur Bywgraffyddol o Enwogion Cymru (Aberdâr 1867-70), ii, 190
• Geirlyfr Bywgraffiadol o Enwogion Cymru (1870)
• H. Blackwell, NLW MSS 9265A: A Dictionary of Welsh Biography
• Hardy, Jesus College (1899)

Dolenni Ychwanegol

• VIAF: 60171818
• Wikidata: Q7327487

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/