MORGAN, PHILIP (bu farw 1435), esgob Caerwrangon (1419) ac Ely (1426)

Ceir y cyfeiriad cyntaf ato yng nghofrestrau esgobion Tyddewi, 28 Mai 1398, lle y disgrifir ef fel doethur yn y gyfraith a rheithor ' Aberedow.' Yn y Papal Letters, 17 Kal. Mehefin 1401, gwelir caniatâd iddo ef, a oedd bellach yn is-ddiacon, i ohirio ei ordeiniad fel diacon ac offeiriad am 10 mlynedd, a chawn gyfeiriad arall ato yn yr un llythyrau, 6 Kal. Mehefin 1405, lle rhoddwyd iddo, a oedd erbyn hyn yn ddoethur yn y gyfraith eglwysig a sifil, adnewyddiad o'i ganiatâd i ddal Llanfeigan ynghyd ag Aberedw. Penodwyd ef, 2 Mai 1407, yn ganon yng ngholeg (h.y. clas) Abergwili, a rhoddwyd iddo brebend Llandegle. O 1414 ymlaen anfonwyd ef yn aml ar genadaethau tramor, a chymerodd ran amlwg yn y trafodaethau i ffurfio cytundeb heddwch â Ffrainc; bu'n brif offeryn i gael adnewyddiad o'r cadoediad arbennig â Fflandrys, 1416. Gwnaed ef yn aelod o'r Cyfrin Gyngor yn 1419. Fel esgob bu'n wyliadwrus i atal drygau clerigol. Adeg Senedd Hydref 1429 anfonwyd yr achos yn erbyn abad Ystrad Fflur ato. Bu farw yn Bishop's Hatfield, swydd Herts, 25 Hydref 1435, a chladdwyd ef yng nghapel y Charterhouse yn Llundain.

Awdur

• Walter Thomas Morgan, (1912 - 1990)

Ffynonellau

• Oxford Dictionary of National Biography
• The Episcopal Registers of the Diocese of St. David's, 1397–1518 (1917–20), 36, 390
• Calendar of entries in the Papal Registers relating to Great Britain and Ireland. Papal Letters, cyf. v, vi

Dolenni Ychwanegol

• Wikidata: Q7184103

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/