MORGAN, RICHARD (1854 - 1939), prifathro

ysgol y cyngor, Llanarmon-yn-Iâl; ganwyd yn Nhalybont, Sir Aberteifi, 1854, yn fab i Thomas Morgan, crydd. Cafodd ei addysg yn yr hen Ysgol Frutanaidd yn Nhalybont ac wedi hynny yng Ngholeg Prifysgol Bangor, a bu'n athro ysgol yn Aberystwyth am beth amser cyn symud i Lanarmon. Treuliodd yn agos i 40 mlynedd o'i oes yn Llanarmon a threfnodd yno hefyd ddosbarthiadau nos llewyrchus iawn. Ei ddiddordeb pennaf oedd natur. Enillodd dair gwobr ar y pwnc yn yr eisteddfod genedlaethol, a chyhoeddodd Tro Trwy'r Wig, Llyfr Blodau, Llyfr Adar, Rhamant y Gog Lwydlas, a hefyd erthyglau yn Cymru a chylchgronau eraill a ddengys ei wybodaeth eang a'i gariad at natur. Ei ddawn at sgrifennu ar y pynciau hyn yn yr iaith Gymraeg sy'n ei hynodi. Cyflwynodd Prifysgol Cymru radd M.A. er anrhydedd iddo yn 1922 am ei gyfraniad i lenyddiaeth Gymraeg. Ymddeolodd yn 1919 a threuliodd y tair blynedd olaf o'i oes yn Nhalybont, ac yno y bu farw ym mis Medi 1939.

Awdur

• Thomas Isfryn Jones

Ffynonellau

• The Welsh Gazette, 5 Hydref 1939
• The Cambrian News and Merionethshire Standard, 6 Hydref 1939
• Cymru (O.M.E.)

Dolenni Ychwanegol

• Wikidata: Q20734297

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/