MORGAN, Syr WILLIAM (bu farw 1584), milwr

mab Syr Thomas Morgan, Pencoed a Langstone, Morgannwg, a Cecilia, merch Syr George Herbert, Abertawe. Aeth i Ffrainc yn 1569 i ymladd fel gwirfoddolwr ym myddin y Protestaniaid. Bu mewn amryw ysgarmesoedd yn y wlad honno ac yn yr Iseldiroedd, a dychwelodd i Loegr mewn pryd i ymuno â iarll Essex yn ei anturiaethau yn Iwerddon. Ar gais yr iarll gwnaed ef yn farchog gan Elisabeth yn 1574, ond cymaint ydoedd ei golledion ariannol tra yn Iwerddon fel y gorfu iddo werthu ei stad yn 1577. Treuliodd gyfran helaeth o'r saith mlynedd nesaf yn ymladd â'r Gwyddelod, a bu farw yn 1584. Priododd Elisabeth, ferch Syr Andrew Judde, un o aldramoniaid dinas Llundain, ond ni fu iddynt blant.

Awdur

• Emyr Gwynne Jones, (1911 - 1972)

Ffynonellau

• Oxford Dictionary of National Biography, a'r awdurdodau a enwir yno

Dolenni Ychwanegol

• Wikidata: Q16844204

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/