MORRIS, CALEB (1800 - 1865), gweinidog Annibynnol

Ganwyd 12 Awst 1800 yn Parcyd, plwyf Eglwyswen, Sir Benfro. Addysgwyd ef yn Aberteifi, ysgol ramadeg Hwlffordd, ysgol ramadeg academi Caerfyrddin (1816-9), ac academi Caerfyrddin (1819-22). Derbyniwyd yn aelod yn eglwys Penygroes, Sir Benfro, yn 14 oed; yno y dechreuodd bregethu yn ddiweddarach. Yn 1822 derbyniodd alwad o Arberth, Sir Benfro, ac ordeiniwyd ef yno 2 Ebrill 1823. Symudodd i Fetter Lane, Llundain, yn 1827. Yn 1838, gwahoddwyd ef i fod yn brifathro academi Aberhonddu, eithr ymgroesodd rhag ymgymryd â'r cyfrifoldeb. Tynnodd sylw mawr fel pregethwr poblogaidd yn Fetter Lane, a dylifai cynulliadau mawr i wrando arno. Oherwydd ysbeidiau o wendid, enciliai i Gymru am atgyfnerthiad. Er chwilio am adferiad yn yr Yswistir a'r Almaen, trethwyd nerth ei ysbryd a'i gorff, ac ymddeolodd a dychwelyd i'w hen gynefin ym Mhenfro lle y bu farw 26 Gorffennaf 1865. Meddai ar ddoniau eithriadol fel pregethwr, a dringodd ar waethaf ei nychdod i fod yn un o oleuadau disglair y pulpud yn Llundain.

Awdur

• Y Parchedig John Dyfnallt Owen, (1873 - 1956)

Ffynonellau

• The Congregational Year Book, 1866
• D. Tyssil Evans, Cofiant a detholiad o bregethau y Parch Caleb Morris, Fetter Lane, Llundain / The life and ministry of the Rev. Caleb Morris who was the minister of the Tabernacle, Narberth; and of Fetter Lane Chapel, London (Caerdydd 1900, 1902), 1900 (argraffiad Saesneg, 1902)

Darllen Pellach

• Evan John Evans, William Flavel Hurndall, 'Caleb Morris', Pulpit memorials: photographs and specimen sermons of twenty Congregational ministers, with brief memoirs by several friends (London 1878), tt. 381-411

Dolenni Ychwanegol

• VIAF: 46697769
• Wikidata: Q20732685

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/