MORRIS, DAVID WILLIAM ('Marmora'; 1823 - 1914), gweinidog gyda'r Bedyddwyr

Ganwyd 9 Hydref 1823 yn Llansteffan, Sir Gaerfyrddin. Magwyd ef yn Llanelli a'i brentisio'n grydd. Er bod ei dad, William Morris, yn bregethwr Methodist, mynnodd 'Marmora' gael ei fedyddio (1845) yng Nghwmafon. Aeth i Goleg Hwlffordd yn 1847. Ordeiniwyd ef yn Bond Street, Lerpwl, 10 Tachwedd 1850. Ymhen chwech wythnos aeth i Gasmael a Beulah. Bu wedyn yn y Berthlwyd, Cwmtwrch, ac Ystradgynlais, Cwmsarnddu, Hafod (Abertawe), lle'r adeiladodd gapel Philadelphia, Pontestyll, a Phontsenni, Scranton (U.D.A.), Cwmsarnddu am yr eiltro, a Tylorville (U.D.A.) 1879-86. Treuliodd weddill ei oes yn Abertawe. Un lled od ydoedd yn ei gwmni. Gweddïai â'i lygaid ar agor, a phregethai weithiau â'i lygaid yng nghau. Ysgrifennai i'r cylchgronau (e.e. Seren Gomer, Y Bedyddiwr, a Baner America) o ddyddiau ei goleg hyd y diwedd ymron, a chipiodd wobrau lawer am draethodau. Cyhoeddodd Blynyddoedd Boreuol Moses, 1851; Maesydd y Myfyriwr ; Bwrdd y Babell, 1870; Rhiniog y Cysegr; Tir Emanuel; Athrofa Iachawdwriaeth. Bu farw 12 Medi 1914.

Awdur

• Y Parchedig William Joseph Rhys, (1880 - 1967)

Ffynonellau

• Y Geninen, Mawrth 1915, 54
• Trafodion Cymdeithas Hanes Bedyddwyr Cymru, 1936, 50

Dolenni Ychwanegol

• Wikidata: Q28360899

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/