MORRIS, WILLIAM ('Rhosynnog '; 1843 - 1922), gweinidog gyda'r Bedyddwyr yng nghapel Noddfa, Treorci, Sir Forgannwg;

Ganwyd 12 Medi 1843 yn Treboeth, Abertawe; mab David Morris. Dechreuodd ddysgu crefft peiriannydd. Cafodd ei addysg yn academïau Abertawe (G. P. Evans) a Phontypŵl. Ordeiniwyd ef yn Nhreorci. Bu'n ysgrifennydd Undeb Bedyddwyr Cymru a Mynwy (1879-98) ac yn llywydd ei gymanfa a'r undeb. Yr oedd yn hyrwyddwr mudiadau dyngarol, dirwestol, ac addysgol yng Nghwm Rhondda; darlithiai lawer, ac yr oedd yn flaenllaw fel gwleidyddwr. Cychwynnodd bump o achosion newydd. Ysgrifennai'n fynych i gylchgronau : Y Bedyddiwr Cymreig, Y Ffenestr, Yr Ymwelydd Misol, Yr Herald Cenhadol, etc. Cyhoeddodd Esboniad or Epistolau Iago a Titus, a gweithiau eraill. Bu farw 21 Rhagfyr 1922.

Awdur

• Y Parchedig William Joseph Rhys, (1880 - 1967)

Ffynonellau

• Dyddiadur a Llawlyfr Undeb Bedyddwyr Cymru, 1909
• Seren yr Ysgol Sul yn cynwys bywgraffiaeth, hanesiaeth naturiol, barddoniaeth, cerddoriaeth, &c., Medi 1943
• Enwogion Presennol y Pulpud Cymreig (1887), i

Dolenni Ychwanegol

• VIAF: 103566248
• Wikidata: Q17053621

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/