MOSES, WILLIAM ('Gwilym Tew o Lan Tâf,' neu ' Gwilym Tew '; 1742 - 1824), bardd

Ganwyd yn 1742 ym Merthyr Tydfil. Ni chafodd fwy na saith mis o ysgol pan yn blentyn gan iddo orfod ennill ei fywoliaeth pan yn ifanc iawn. Ymdrechodd yn galed i'w ddisgyblu ei hun yn y grefft o sgrifennu barddoniaeth a hyn yn wyneb anawsterau mawr. Ni fu'n berchen ar ramadeg na geirlyfr Cymraeg hyd yn ddiweddar iawn yn ei oes, ond gymaint oedd ei gariad at y Gymraeg, ynghyd â'i allu naturiol, nes iddo lwyddo, yn y diwedd, i gyfansoddi nifer o benillion canmoladwy ar wahanol destunau. Yn 1808 cyhoeddodd ei gyfrol gyntaf o ganeuon, ac yn 1824, ychydig cyn ei farw, ymddangosodd yr ail argraffiad yn dwyn y teitl Caingc y Gog; neu amryw gyfansoddiadau ar wahanol destunau yn cynnwys cynghorion, myfyrdodau, galarnadau, annerchiadau (J. James, Merthyr Tydfil). Bu farw 27 Tachwedd 1824 ym Merthyr Tydfil.

Awdur

• Dr Moelwyn Idwal Williams

Ffynonellau

• T. R. Roberts, Eminent Welshmen: a short biographical dictionary of Welshmen... from the earliest times to the present (1908)
• H. Blackwell, NLW MSS 9267A: A Dictionary of Welsh Biography
• The Cambrian, 24 Rhagfyr 1824

Dolenni Ychwanegol

• Wikidata: Q28360900

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/