NEWCOME, RICHARD (1779 - 1857), clerigwr

Ganwyd 8 Mawrth 1779 yn Gresford, ger Wrecsam (lle yr oedd ei dad yn ficer 1764-1803), mab Henry Newcome ac Elizabeth ei wraig, a gor-nai Richard Newcome, esgob Llandaf (1755-61) a Llanelwy (1761-9). 'Cafodd ei addysg yn ysgol Rhuthyn a Choleg Queens ', Caergrawnt, a graddio'n B.A. yn 1800 ac M.A. yn 1804. Urddwyd ef yn ddiacon gan yr esgob Bagot o Lanelwy, Medi 1801, ac yn offeiriad gan yr esgob Horsley, Medi 1803. Trwyddedwyd ef i guradiaeth Wrecsam, Mawrth 1804, ac ym Mehefin yr un flwyddyn dyrchafwyd ef yn warden Rhuthyn a rheithor Llanfwrog. Daliodd y swyddi hyn am 47 mlynedd. Gwnaed ef hefyd yn ganon yn eglwys gadeiriol Bangor (1821), yn archddiacon Meirionnydd (1834) (yr oedd deoniaeth Dyffryn Clwyd y pryd hwnnw yn esgobaeth Bangor), ac yn rheithor Clocaenog (1829-34). Yn 1851 ymddeolodd o Ruthyn a Llanfwrog a bu am chwe blynedd yn ficer Llanrhaeadr-yng-Nghinmeirch. Ysgrifennodd Memoirs of Dean and Bishop Goodman, 1825, a hanes cestyll a threfi Rhuthyn a Dinbych, 1829. Bu farw yn Llanrhaeadr, 7 Awst 1857, a'i gladdu yn Rhuthyn.

Awdur

• Thomas Iorwerth Ellis, (1899 - 1970)

Ffynonellau

• H. B. Thomas, A History of the Diocese of St. Asaph (1874)
• A. Ivor Pryce, Diocese of Bangor During Three Centuries, seventeenth to nineteenth century inclusive being a digest of the registers of the bishops (1929)
• cofrestri esgobaeth Llanelwy, Ll.G.C.
• F. Boase, Modern English Biography containing many thousand concise memiors of persons who have died since the year 1850, with an index of the most interesting matter, 1897, ii, 1118
• A. O. Evans, A Chapter in the History of the Welsh Book of Common Prayer; or, the letters which were written preparatory to the revised edition of 1841. Annotated, with biographical sketches (Bangor 1922), iii, 312-4

Dolenni Ychwanegol

• Wikidata: Q20734299

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/