OWEN, MORFYDD LLWYN (1891 - 1918), cyfansoddwr, pianydd, a chantores

Ganwyd 1 Hydref 1891 yn Nhrefforest, Sir Forgannwg, yn ferch i William a Sarah Jane Owen. Roedd ei rhieni'n gerddorol - ei mam yn gantores a phianydd o allu uwch na'r cyffredin. Cafodd ei haddysg yn ysgol ganolradd Pontypridd a Choleg y Brifysgol, Caerdydd, lle yr oedd yn dal ysgoloriaeth gerddorol 'Caradog,' 1909-12, ac y graddiodd yn Mus. Bac. yn 1912; cafodd yrfa ddisglair yn y Royal Academy of Music, 1912-7; daliai ysgoloriaeth Goring Thomas, 1913-7, a dyfarnwyd iddi amryw o brif wobrau a medalau yr academi.

Yr oedd Morfydd Owen yn gerddor amryddawn a llawn o deimlad; yr oedd ganddi ddawn arbennig fel cyfansoddwr. Ymysg ei chyfansoddiadau y mae gweithiau i gerddorfau mawr a bach, i gorau, unawdau piano, caneuon (ynghyd â threfniadau alawon gwerin) - ac y mae i'r rhai hyn i gyd wreiddioldeb trawiadol, techneg perffaith, ac ansawdd arbennig yn perthyn iddynt. Y mae llawer o'i cherddoriaeth yn tarddu o ymdeimlad personol a chenedlaethol a symbylwyd gan lenyddiaeth a llên gwerin ei phobl. Y mae tair o'i chaneuon - ' To our Lady of Sorrows,' ' Slumber Song of the Madonna,' a ' Gweddi Pechadur ' - yn enghreifftiau ardderchog o'i hathrylith; y mae'r tair, a'r dôn gynulleidfaol ' William,' wedi ennill eu plwyf yng Nghymru.

Priododd Chwefror 1917 â'r seicolegydd Ernest Jones (bu farw 1958). Bu ei marw, 7 Medi 1918, yn yr oedran cynnar o 26, yn golled drom i gerddoriaeth Cymru.

Awdur

• Evan Thomas Davies, (1878 - 1969)

Ffynonellau

• Gwybodaeth bersonol

Darllen Pellach

• Y Goleuad, 10 Awst 1960
• Rhian Davies, Eneth ddisglair annwyl: Never so pure a sight (1994)
• Ben Gwalchmai, 'If the significance were fully realised, a nation would weep at her grave', WalesOnline, 1 March 2017
• Morfydd Owen (1891-1918), gwefan Tŷ Cerdd, gwelwyd 7 Mawrth 2018
• Tom Davies, 'Marwolaeth Morfudd Llwyn Owen', Y Traethodydd (Cyf. 173, rhif 725, Ebrill/April 2018), tt. 104-113
• Andrew Green, Morfydd Llwyn Owen a Ruth Herbert Lewis
• Erthygl Wicipedia: Morfydd Llwyn Owen

Dolenni Ychwanegol

• Archifau LlGC: NLW MS 18247D. - Material relating to Morfydd Owen (1891-1918), musician, including a typescript biography
• Archifau LlGC: Eliot Crawshay-Williams Papers, G 25-48: Morfydd Llwyn Owen - gohebiaeth
• NLW Archives: Kitty Idwal Jones papers: Morfydd Llwyn Owen
• VIAF: 50033248
• Wikidata: Q6911506

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/