OWENS, OWEN (1794 - 1838), prif ddyn y 'Wesle Bach.'

Preswyliai yn Caergron, Llaneilian (Amlwch), ac yr oedd yn bregethwr cynorthwyol gyda'r Wesleaid yn 1816. Teimlid cryn anniddigrwydd ymysg pregethwyr cynorthwyol yr enwad yn erbyn awdurdod y gweinidogion urddedig; ac yn 1831 cyfarfu deuddeg ohonynt, ac Owens ar y blaen, i ystyried y sefyllfa. Ar 6 Hydref 1831 penderfynwyd ymado â'r cyfundeb Wesleaidd a ffurfio enwad newydd. Owen Owens oedd y selocaf yn y mudiad, a theithiodd yn Arfon, Llŷn, Meirion, Maldwyn, a Cheredigion i bregethu ei egwyddorion, nid heb gryn fesur o lwyddiant i'r 'Wesle Bach' ac o golledion i'r cyfundeb Wesleaidd. Bu ei farw (yn ei gartref), 10 Mawrth 1838, yn 44 oed, yn ddyrnod drom i'r enwad bychan; yr oedd eisoes mewn anawsterau ariannol, ac yn raddol suddodd yn ôl i fynwes yr hen gyfundeb, neu i fudiadau Wesleaidd 'diwygiadol' eraill, neu, ar y llaw arall, ymunodd aelodau ohono ag eglwysi Ymneilltuol.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• A. H. Williams, Welsh Wesleyan Methodism, 1800-1858 its origins, growth and secessions (1935), pen. vii

Dolenni Ychwanegol

• Wikidata: Q20734109

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/