OWEN, ROBERT (1820 - 1902), clerigwr 'Anglo-Catholig'

Ganwyd yn 1820 yn drydydd mab i David Owen, Dolgellau; aeth i Goleg Iesu, Rhydychen, 22 Tachwedd 1838, 'yn 18 oed'; graddiodd yn 1842 (B.D. 1852); bu'n gymrawd o'i goleg, 1845-64, a llanwodd amryw swyddau yno; a bu'n arholwr i'r brifysgol, yn y gyfraith, yn 1859. Urddwyd ef gan Bethell, esgob Bangor, yn 1843, ond ni fynnai unrhyw fywoliaeth eglwysig. Yr oedd yn uchel-Eglwyswr pendant iawn, a chyhoeddodd An Apology for the High Church Movement on Liberal Principles, 1851; The Pilgrimage to Rome (prydyddiaeth), 1863; a nifer o lyfrau eraill (ar y seintiau, y gyfraith ganon, a phynciau cyffelyb); un yn unig sydd a fynno â Chymru, sef The Kymry, their Origin, History, and International Relations, 1891. Cefnogai ddatgysylltu a dadwaddoli'r Eglwys yng Nghymru, modd y gallai hi fynnu ei rhyddid a chadw ei 'chatholigrwydd.' Bu'n byw flynyddoedd lawer yn Vron y Graig, Abermaw (yr oedd ganddo stad yn y cyffiniau), a bu farw yno 6 Ebrill 1902, 'yn 82 oed.'

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• Foster, Alumni Oxonienses: the members of the University of Oxford
• Crockford's Clerical Directory
• Bye-Gones, relating to Wales and the Border Counties, 1902, 350

Dolenni Ychwanegol

• VIAF: 38136473
• Wikidata: Q7348182

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/