OWEN, WILLIAM (1750 - 1830), clerigwr efengylaidd

Olynydd Thomas Charles o'r Bala yn Sparkford a Milborne Port, Gwlad yr Haf; mab hynaf Joseph Owen, rhydd-ddeiliad y Fron Goch, Nanhyfer, Sir Benfro; ganwyd yn 1750. Ordeiniwyd ef yn ddiacon ar 15 Awst 1773 ac yn offeiriad ar 6 Awst 1775. Bu'n gurad yn ei gartref, sef Nanhyfer, 1775-9, yn Sparkford, 1783-5, ac yn Milborne Port, 1785-91, gan ddyfod yn gurad 'parhaol' yn Milborne Port yn nes ymlaen. Rhoddes esgob Henffordd iddo ficeriaeth Almeley 11 Rhagfyr 1816 ac at hynny cafodd reithoraeth Ryme Intrinsica, Sherborne, 6 Mawrth 1823, dan nawddogaeth tywysog Cymru (y brenin Siôr IV wedi hynny). Ymwelai â Sir Benfro 'n fynych, a daeth y Fron Goch yn eiddo iddo ar farw ei dad. Bu'n gefnogydd eiddgar i'r genhadaeth dramor (y ' Church Missionary Society'). Bu farw 4 Chwefror 1830 a chladdwyd yn Sherborne.

Awdur

• Y Parchedig Daniel Williams, (1878 - 1968)

Ffynonellau

• Edward Morgan, A brief Memoir of the life and labours of the Rev. T. Charles, A.B. late of Bala, Merionethshire (London 1831), 196
• Transactions of the Carmarthenshire Antiquarian Society and Field Club, ii, 193
• Edward Morgan, Essays, letters, and interesting papers of the late Rev. Thomas Charles (London 1836), 359-60
• D. E. Jenkins, Life of Thomas Charles (Dinbych 1908), i, 518-9

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/