PARRY, DAVID ('Dewi Moelwyn '; 1835 - 1870), gweinidog a bardd

Ganwyd yn 1835 yn fab John Parry, Ffestiniog, Sir Feirionnydd. Derbyniodd ryw gymaint o addysg fel bachgen, ac yn 1850, pan nad oedd ond 15 oed, enillodd y wobr gyntaf am gywydd ar 'Yr Argraffwasg' yn eisteddfod Ffestiniog. Derbyniwyd ef yn aelod o gapel Saron, Ffestiniog, ond symudodd i Gaernarfon yn 1856. Yno ymaelododd yng nghapel Pendref, ac yn 1857 dechreuodd bregethu. Derbyniwyd ef i Goleg (A.) y Bala yn 1861 fel efrydydd ar gyfer y weinidogaeth Annibynnol (Y Dysgedydd, 1861, 439), ac ordeiniwyd ef yn weinidog yng nghapel Adulam, Tredegar, sir Fynwy, ddydd Nadolig 1863. Ymddiswyddodd yn 1867, ac ymfudodd i America. Ymgymerodd â gweinidogaeth capel yr Annibynwyr yn Providence, Scranton, talaith Pennsylvania, a llafuriodd yno o Fedi 1867 hyd ei farwolaeth 8 Medi 1870. Ychydig cyn ei farw, priododd â Kate Williams o Bradford, Pennsylvania. Ef oedd golygydd barddoniaeth y newyddiadur Cymraeg Baner America a gychwynnwyd yn Hyde Park, Pennsylvania, yn 1868.

Awdur

• Hywel David Emanuel, (1921 - 1970)

Ffynonellau

• David Jones, Memorial volume of Welsh Congregationalists in Pennsylvania, U.S.A., their churches, periodical convocations, clergy and prominent lay members (Utica 1934), 307-8
• Hanes Eglwysi Annibynnol Cymru, i, 213, 482; iii, 242
• G. J. Williams, Hanes plwyf Ffestiniog o'r cyfnod boreuaf (Wrexham 1882), 227
• T. M. Jones, Llenyddiaeth fy Ngwlad: sef hanes y newyddiadur a'r cylchgrawn Cymreig yn Nghymru, America, ac Awstralia, yn nghyd a'u dylanwad ar fywyd cenedl y Cymry (Treffynnon 1893), 206
• Y Dysgedydd, 1870, 322-3
• H. B. Thomas, Hanes Cymry America (1872), i, 59
• Baner ac Amserau Cymru, 12 Hydref 1870

Dolenni Ychwanegol

• Wikidata: Q28361200

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/