PARRY, THOMAS ('Llanerchydd '; c. 1809 - 1874), bardd

mab Richard a Margaret Parry o Lannerch-y-medd, sir Fôn, a brawd i Richard Parry ('Gwalchmai'). Cyfrwywr oedd wrth ei grefft, a bu'n amlwg ym mywyd cymdeithasol a diwylliannol Llannerch-y-medd. Bu hefyd yn ddiacon ac yn ysgrifennydd yn y capel Annibynnol yn y pentref am amser hir. Ond fel bardd y cofir amdano yn bennaf. Enillodd ei wobr gyntaf yn eisteddfod Llannerch-y-medd yn 1835 am farwnad i'r Parch. John Richards, a bu'n fuddugol lawer tro yn ystod yr 20 mlynedd dilynol yn eisteddfodau Llundain, y Fenni, Merthyr Tydfil, Rhuddlan, a mannau eraill. Wedi cystudd byr, bu farw 11 Tachwedd 1874 yn 65 oed, gan adael ar ei ôl weddw a merch, a chladdwyd yn Llannerch-y-medd.

Awdur

• Hywel David Emanuel, (1921 - 1970)

Ffynonellau

• Richard Parry ('Gwalchmai'), Enwogion Môn: henafol a diweddar, mewn cofnodau hanesol (1877), 115-116
• Yr Herald Cymraeg, 20 Tachwedd 1874
• Seren Gomer, 1835, 215-6
• Y Geninen, xxii, 62 g.; xxiv, 34; xxvii, 21 g.; xxviii, 29 g

Dolenni Ychwanegol

• Wikidata: Q28361336

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/