PECOCK, REGINALD (c. 1390 - c. 1461), esgob Llanelwy a Chichester

Y mae'n bosibl ei fod o dras Cymreig. Dywed traddodiad mai un o Dalacharn, Sir Gaerfyrddin, ydoedd; er nad oes yr un dystiolaeth bendant o blaid hyn, gwyddys fod rhai yn dwyn yr enw Pecock yn y dref honno yn y Canol Oesoedd. Priododd rhyw Jenkyn le Whitt, Dinbych-y-pysgod, a fu farw yn 1461, ag Elen, aeres Jenkyn Pecoc, Talacharn a Dinbych-y-pysgod - ac efallai i Reginald Pecock ddeillio o'r teulu hwn, serch bod yr arfbais a briodolir i'r esgob yn wahanol i honno a ddygid gan Elen Pecoc. Gelwir ef yn ' presbyter dioecesis Menevensis,' eithr nid ydyw hyn na'r ffaith iddo gael ei ddewis i esgobaeth Gymreig yn profi tras Gymreig; nid oes, ychwaith, unrhyw ôl Cymraeg yn y math o Saesneg a ysgrifennai ef. Yr oedd Pecock yn ddoethur mewn diwinyddiaeth yn Rhydychen, ac yn gymrawd o Goleg Oriel yn y brifysgol honno, 1414-25; cafodd ei ordeinio, 1420-1; bu'n rheithor S. Michael Royal ac yn bennaeth Whittington College, Llundain, 1431-4; yn esgob Llanelwy, 1444-50; ac yn esgob Chichester, 1450-8. Tua 1455, ymddangosodd ei waith mwyaf adnabyddus, A Repressor of Over Much Blaming of the Clergy, ateb i ymosodiadau'r Lolardiaid ar yr Eglwys. Ond mewn gweithiau eraill - am y rhain, gweler yr ysgrif arno yn y D.N.B. - amlygodd olygiadau a ystyrid yn anuniongred, a gwysiwyd ef o flaen llys archesgob Caergaint. Safodd ei brawf am heresi ar 28 Tachwedd 1457, tynnodd ei eiriau yn ôl ar 3 Rhagfyr; darllenwyd ei ddatgyffesiad, a llosgwyd ei lyfrau gerllaw Paul's Cross ar 4 Rhagfyr; wedi hynny anfonwyd ef i Gaergaint a Maidstone o dan ryw fath o ofalaeth - mewn enw. Wedi mis Awst 1458 anfonwyd ef i abaty Thorney, sir Caergrawnt; ymddengys iddo farw yno c. 1461. Ni wyddys fan ei fedd.

Awdur

• Ivor John Sanders, (1911 - 1991)

Ffynonellau

• Oxford Dictionary of National Biography
• Heraldic Visitations of Wales and Part of the Marches between the years 1586 and 1613, under the authority of Clarencieux and Norroy, two kings at arms (Llandovery 1846)
• E. Laws a E. H. Edwards, Church book of St. Mary the Virgin, Tenby (Tenby 1907)
• W. K. R. Bedford, The Blazon of Episcopacy being the arms borne by or attributed to the archbishops and bishops of England and Wales with an ordinary of the coats described and of other episcopal arms (1858, 1897)
• V. H. H. Green, Bishop Reginald Pecock a study in ecclesiastical history and thought (Rhydychen 1945)

Dolenni Ychwanegol

• VIAF: 44413993
• Wikidata: Q7308836

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/