PETTINGALL, JOHN (1708 - 1781), hynafiaethydd

Ganwyd 1708, mab Francis Pettingall, ficer Casnewydd-ar-Wysg. Ymaelododd yng Ngholeg Iesu, Rhydychen, 15 Mawrth 1725, a graddiodd yn B.A. yn 1728; cafodd y radd o M.A. yng Nghaergrawnt yn 1740, a D.D. yn ddiweddarach. Bu am rai blynyddoedd yn bregethwr yng nghapel Duke Street, Westminster. Penodwyd ef, 3 Mehefin 1757, yn brebendari yn eglwys gadeiriol S. Paul, Llundain, a gwnaed ef, 28 Gorffennaf 1758, yn brebendari yn Lincoln. Etholwyd ef yn F.S.A. yn 1752, a darllenodd dri phapur o flaen y gymdeithas. Cyhoeddodd A Dissertation on the Origin of the Equestrian Figure of George and of the Garter, 1753; The Latin Inscription on the Copper Table discovered in the year 1732, near Heraclea, 1760; A Dissertation upon the Tascia or Legend of the British Coins of Cunobelin and Others, 1763; a An Enquiry into the use and Practice of Juries among the Greeks and Romans, 1769. Cyfieithodd hefyd Discours Historique et Critique des Principaux Auteurs qui ont écrit pour ou contre le Christianisme gan A. C. F. Houtteville, gyda rhagair a nodiadau, 1739. Bu farw tua diwedd 1781.

Awdur

• Walter Thomas Morgan, (1912 - 1990)

Ffynonellau

• Oxford Dictionary of National Biography
• The Gentleman's Magazine, 1781, 442

Dolenni Ychwanegol

• VIAF: 54511822
• Wikidata: Q6252700

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/