PHILLIPS, DAVID (1812 - 1904), gweinidog gyda'r Methodistiaid Calfinaidd, bardd a golygydd

Ganwyd 14 Rhagfyr 1812 ym Mancyfelin, Sir Gaerfyrddin, mab y Parch. Joshua Phillips (1785 - 1868) - yr oedd JOHN PHILLIPS (1750 - 1842), Meidrym, ei dadcu, yntau yn bregethwr Methodist adnabyddus. Symudodd yn ieuanc i Faesteg, Morgannwg, lle bu'n bostfeistr. Dechreuodd bregethu yn 1839 a bu'n fath ar fugail ar eglwys Tabor. Ordeiniwyd ef yn sasiwn Aberafan, 1854. Symudodd i Abertawe yn 1873; bu farw yno 5 Mehefin 1904, a'i gladdu ym mynwent y Crug-glas. Cyhoeddwyd cyfrol o'i gerddi defosiynol o dan y teitl Y Dyn Crist Iesu. Bu ef a Thomas Levi yn cydolygu'r cylchgrawn i ieuenctid, Yr Oenig, 1853-6. Ceir llawer o'i gynnyrch llenyddol yng nghylchgronau'r Methodistiaid Calfinaidd.

Awdur

• Y Parchedig Gomer Morgan Roberts, (1904 - 1993)

Ffynonellau

• Y Drysorfa, 1842, 128; 1905, 16
• Y Geninen (Gŵyl Dewi), 1905, 10
• Blwyddiadur y Methodistiaid Calfinaidd, 1905, 204
• Joseph Evans, Biographical Dictionary of Ministers and Preachers of the Welsh Calvinistic Methodist Body … to the close of the year 1850 (1907), 242
• T. M. Jones, Llenyddiaeth fy Ngwlad: sef hanes y newyddiadur a'r cylchgrawn Cymreig yn Nghymru, America, ac Awstralia, yn nghyd a'u dylanwad ar fywyd cenedl y Cymry (Treffynnon 1893), 153
• J.M. Jones, Hanes Eglwys Tabor, Maesteg, 21

Dolenni Ychwanegol

• Wikidata: Q20732881

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/