PHILIPPS, JENKIN THOMAS (bu farw 1755), athro ac awdur

brodor o Lansawel, Sir Gaerfyrddin. Bu'n efrydydd ym Mhrifysgol Basle, yr Yswisdir, lle, yn 1707, y traddododd araith Ladin ar y testun ' Dibenion Teithio.' Cyhoeddwyd hon yn Llundain yn 1715. Yr oedd yn swyddog yn y llys brenhinol mor gynnar â 1715, pryd yr ysgrifennodd, yn Lladin a Ffrangeg, Discours touchant l'origine et le progres de la religion chrétienne parmi la nation britannique, presenté au Roi. Ail-gyhoeddwyd y Lladin yn Dissertationes quatuor (Llundain, 1735). Yr oedd yn ieithydd penigamp, ac yr oedd yn athro ieithoedd rhwng 1717 a 1720. Ysgrifennodd lyfr ar ei ddull o addysgu, yn dwyn y teitl A compendious way of teaching ancient and modern languages (Llundain, ail arg., 1723). Rhywbryd cyn 1726 daeth yn athro i blant y brenin Siôr II, yn cynnwys William Augustus, dug Cumberland. Ar gyfer hwnnw, ysgrifennodd amryw ramadegau a llyfrau darllen Lladin. Yn ychwanegol at lawer araith Ladin ar destunau diwinyddol ac eglwysig, cyhoeddodd amryw lyfrau Saesneg ar wahanol destunau, megis cyfreithiau a llywodraeth Denmark, a bywgraffiadau o bersonau brenhinol. Yn ei ewyllys gadawodd £60 y flwyddyn tuag at gynnal ysgol rydd yn ei blwyf genedigol, ond bu farw 22 Chwefror 1755 cyn arwyddo'r ewyllys.

Awdur

• John James Jones, (1892 - 1957)

Ffynonellau

• Oxford Dictionary of National Biography, a'r awdurdodau a enwir yno
• Cymru yn hanesyddol, parthedegol, a bywgraphyddol (1875)
• British Museum. Catalogue of Printed Books (1882)

Dolenni Ychwanegol

• VIAF: 244610350
• Wikidata: Q18731141

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/