PRICHARD, JOHN (1821 - 1889), gweinidog gyda'r Methodistiaid Calfinaidd, a hanesydd Methodistiaeth Môn

Ganwyd yn Amlwch yn 1821. Wedi gweithio yng ngwaith copr Mynydd Parys, bod mewn amryw ysgolion, dechreuodd bregethu yn 1844, ac aeth i Goleg y Bala yn 1845. Bwriodd chwe blynedd yn cenhadu ac yn cadw ysgol ym Mancot, Sir y Fflint; ond dychwelodd i Amlwch yn 1853 - cadwai ei wraig siop yno hyd 1863. Ordeiniwyd ef yn 1857, ac yn 1864 ymgymerth â bugeilio eglwys Porth Amlwch; ymddeolodd o'i ofalaeth yn 1884. Disgrifir ef fel ' pregethwr poblogaidd anghyffredin' ym mhob rhan o Gymru. Sgrifennai lawer i'r cyfnodolion; ond yr unig waith o bwys a adawodd yw Methodistiaeth Môn, 1888. Yr oedd yn llywydd cymdeithasfa'r Gogledd ar adeg ei farwolaeth, 18 Hydref 1889. Y mae cofiant iddo gan John Williams, 1898.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• Y Gwyddoniadur Cymreig (1889–96) (ail arg.), viii, 468o-468p
• R. Hughes, Enwogion Môn, 1850–1912 (Dolgellau 1913)

Dolenni Ychwanegol

• Wikidata: Q20733613

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/