PRICHARD, RICHARD (1811 - 1882), gweinidog Wesleaidd

Ganwyd ym Mangor, 31 Mawrth 1811. Ymunodd â'r seiat Wesleaidd yn 1823, dechreuodd bregethu yn 1827, a daeth cryn alw am ei wasanaeth yn fuan. Bu'n ' was cylchdaith ' ym Machynlleth (1829-31), a Llandysul (1831-2); derbyniwyd yn ymgeisydd am y weinidogaeth yn 1830 a dechreuodd deithio yn 1832. Gwasnaethodd gylchdeithiau Caerdydd (1832-3), Dolgellau (1834-5, 1845-7), Caernarfon (1836, 1866-8), Llanrwst ac Abergele (1837-9), Llanfaircaereinion (1840-2), yr Wyddgrug (1843-4, 1858-60), Llanfyllin (1848-50), Biwmares (1851), Lerpwl (1852-4, 1863-5), Rhuthyn (1855-7), Coedpoeth (1861-2), y Rhyl (1869-71), a Chonwy (1872). Wedi ymneilltuo yn 1873, ymsefydlodd yn y Rhyl, lle y bu farw 12 Mai 1882. Bu'n ysgrifennydd cronfa fenthyciol talaith Wesleaidd Gogledd Cymru o'i chychwyniad (1855) hyd ei ymneilltuad. Yr oedd yn bregethwr effeithiol, yn fedrus ynglŷn â chodi capelau a chlirio eu dyledion, ac yn awdur amryw lyfrau defnyddiol yn eu cyfnod. Bu ei Holwyddorydd Duwinyddol, 1857, yn boblogaidd am flynyddoedd. Golygodd Y Winllan.

Awdur

• Y Parchedig Griffith Thomas Roberts, (1887 - 1977)

Ffynonellau

• Cofiant yn Yr Eurgrawn Wesleyaidd, 1886-7, passim
• rhestr o'i weithiau yn T. Jones-Humphreys, Methodistiaeth Wesleyaidd Cymreig sef trem ar ei sefydliad, ei gwaith, a'i llwyddiant yn ystod y ganrif gyntaf o'i hanes (Treffynnon 1900), 171 sqq

Darllen Pellach

• Erthygl Wicipedia: Richard Prichard (gweinidog Wesleaidd)

Dolenni Ychwanegol

• Wikidata: Q20738146

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/