PRYCE, THOMAS (1833 - 1904), hynafiaethydd

Ganwyd 5 Medi 1833, mab David Pryce, Trederwen Hall, Llandrinio, Sir Drefaldwyn. Addysgwyd ef yn y Liverpool College. Ar ôl gadael yr ysgol ymfudodd i Java, lle priododd yn 1863 â merch i Jacobus G. T. a Aldous van Motman o Dramaga. Ar ôl treulio 28 mlynedd yn Java aeth am bum mlynedd i'r Hâg. Oddi yno dychwelodd i Gymru ac aeth i fyw i Bentre Heylin, Llandysilio, Sir Drefaldwyn. Cymerodd ran amlwg ym mywyd cyhoeddus y sir. Bu'n ustus heddwch, yn aelod o'r cyngor sir, a chadeirydd y cyngor plwyf. Yr oedd yn hynafiaethydd brwd ac yn aelod o gyngor y Powysland Club. Ysgrifennodd hanes plwyf Llandysilio ac fe'i cyhoeddwyd yn Collections, historical & archaeological relating to Montgomeryshire, xxxi a xxxii . Bu farw 23 Mehefin 1904, a chladdwyd ef ym mynwent Llandysilio.

Awdur

• Walter Thomas Morgan, (1912 - 1990)

Ffynonellau

• Bye-Gones, relating to Wales and the Border Counties, 1904, 370-1
• D.R.T., Obituary: Thomas Pryce, J.P., Pentre Heylin, Collections historical & archaeological relating to Montgomeryshire and its borders, xxxiii, 282-4

Dolenni Ychwanegol

• Wikidata: Q20734521

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/