ROBERTS, JOHN (1806 - 1879), cerddor

Ganwyd yn Sarnau, ger y Bala. Yn fachgen llafuriai ar y ffermydd o gwmpas ei gartref. Symudodd yn ddyn ieuanc i Aberystwyth, lle y dysgodd y grefft o gerfio. Astudiodd gerddoriaeth, daeth yn gerddor da, a llafuriodd yn ddiwyd gyda cherddoriaeth y dref a'r ardaloedd cylchnol. Yn 1853 dug allan Perorydd y Cysegr yn cynnwys cant o donau - yn eu mysg y dôn ' Alexander,' 8.7.D., a'r flwyddyn 1824 wrthi. Ymddangosodd y dôn yn Greal y Bedyddwyr, 1833. Dywaid John Roberts iddo ei chyfansoddi yn 18 oed. Cyhoeddodd Seraff Cymru hefyd, yn cynnwys anthemau a chôrganau dan olygiaeth J. Wilks, organydd yn Aberystwyth. Yn 1855 symudodd i Aberdâr, a bu'n arwain y canu yng nghapel Bedyddwyr Penpound am flynyddoedd. Dychwelodd yn ôl i Aberystwyth yn 1873, ac yno y bu farw, 18 Tachwedd 1879. Claddwyd ef yng a nghladdfa Aberystwyth.

Awdur

• Robert David Griffith, (1877 - 1958)

Ffynonellau

• M. O. Jones, Bywgraffiaeth Cerddorion Cymreig (1890)
• Y Cerddor, Mehefin 1893 a Mehefin 1918
• Cymru (O.M.E.), 1899

Dolenni Ychwanegol

• Wikidata: Q20733645

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/