ROGER o GONWY (bu farw 1360), brawd o Urdd S. Ffransis

Y mae'n debyg mai brodor o Gonwy ydoedd. Yn y dogfennau Lladin y mae ei enw yn amrywio - Rogerius de Conveney, R. de Conewey Cambrensis, a R. de Chonnoe. Yr olaf ydyw ffurf ei enw yn yr argraffiad o'r unig un o'i weithiau y gwyddys amdanynt. Bu'n efrydydd yn Rhydychen, a chael y gradd, o D.D. Yr oedd yn aelod o Urdd S. Ffransis yn nhalaith ('custodia') Caerwrangon, ond yn 1355 cafodd ddiploma gan y pab Innocent VI yn caniatáu iddo ymsefydlu yn nhalaith Llundain. Enwogir ef yn hanes y Ffransisciaid fel awdur traethodyn yn dwyn y teitl, yn ei ffurf argraffedig, Defensio mendicantium. Ysgrifennodd y gwaith hwn mewn ateb i'r traethodyn, Defensio curatorum, gan Richard FitzRalph, archesgob Armagh. Ysgrifennodd Roger ei draethodyn yn 1357, sef dwy flynedd wedi iddo ymsefydlu yn Llundain. Y pryd hynny ffynnai cryn wrthwynebiad i'r ymarfer o dlodi a chardota ymhlith aelodau'r urdd. Argraffwyd y traethodyn yn gyntaf yn Lyons yn 1494; adargraffwyd ef ym Mharis yn 1511, a cheir ef hefyd yn Monarchia Sancti Romani Imperii, gan M. Goldast, iii.

Awdur

• John James Jones, (1892 - 1957)

Ffynonellau

• Oxford Dictionary of National Biography a'r awdurdodau a enwir yno
• Waddingus, Annales Minorum seu trium Ordinum a S. Francisco institutorum … Editio tertia accuratissima auctior et emendatior … Cura et studio sodalium eiusdem Ordinis (1931), 3ydd arg. (cyf. iii)
• A. G. Little, Studies in English Franciscan History being the Ford lectures delivered in the University of Oxford in 1916 (Manceinion 1917), 113, 117

Darllen Pellach

• Erthygl Wicipedia: Roger o Gonwy

Dolenni Ychwanegol

• VIAF: 27802352
• Wikidata: Q18527541

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/