SHORT, THOMAS VOWLER (1790 - 1872), esgob Llanelwy

Ganwyd yn Dawlish, 16 Medi 1790, yn fab i'r archddiacon William Short. O ysgolion Exeter a Westminster, aeth i Goleg Eglwys Crist yn Rhydychen; graddiodd (â ' double first') yn 1813; bu'n gymrawd o'i goleg ac yn ddarlithydd a swyddog yno hyd 1823. Bu wedyn â gofal rhes o blwyfi arno, hyd ei ethol yn esgob Ynys Manaw yn 1841. Symudwyd ef i esgobaeth Llanelwy yn 1846. Ymddeolodd, 8 Ionawr 1870, a bu farw yn ficerdy Gresford, 13 Ebrill 1872; claddwyd ef yn Llanelwy. Cyhoeddodd gryn nifer o lyfrau ar bynciau diwinyddol ac addysgol. Efallai'n wir mai addysg oedd ei brif ddiddordeb; cyfrannodd yn hael, allan o'i gyflog ac o'i incwm personol, at godi ysgolion yn ei esgobaeth - pan fu farw nid oedd blwyf yn yr holl esgobaeth heb ysgol. Ymddiddorai hefyd yn nulliau cyfrannu addysg; noder yn neilltuol iddo, serch mai Sais uniaith ydoedd, fynnu darparu gwerslyfrau ac ynddynt wersi Cymraeg a Saesneg wyneb yn wyneb â'i gilydd.

Awdur

• Yr Esgob William Thomas Havard, (1890 - 1956)

Ffynonellau

• Oxford Dictionary of National Biography
• H. B. Thomas, A History of the Diocese of St. Asaph (1874)
• A. G. Edwards, Landmarks in the History of the Welsh Church (1912)
• llawysgrifau yn llyfrgell esgopty Llanelwy

Dolenni Ychwanegol

• VIAF: 49216562
• Wikidata: Q1525191

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/