THOMAS, ALFRED, barwn Pontypridd (1840 - 1927), o Fronwydd, Caerdydd

Ganwyd 16 Medi 1840, yn Llwyn-y-grant, Pen-y-lan, Caerdydd, yn fab i Daniel Thomas, ymgymerwr. Addysgwyd ef yn ysgol Weston, ger Bath, a threuliodd ei oes ym musnes ei dad. Daeth yn ŵr amlwg mewn llawer o gylchoedd cyhoeddus. Bu'n aelod o gyngor dinas Caerdydd am 11 mlynedd o 1875 ymlaen ac yn faer yn 1881-2. Bu'n aelod seneddol dros etholaeth newydd dwyrain Morgannwg o 1885 hyd ei ymddiswyddiad yn 1910. Yr oedd hefyd yn ustus heddwch dros Gaerdydd a Morgannwg, ac yn ddirprwy-raglaw Morgannwg. Rhoes gefnogaeth frwd i'r Coleg Prifysgol a godwyd yng Nghaerdydd yn 1882 a bu'n aelod o'r cyngor ac yn llywydd. Ef hefyd oedd llywydd cyntaf Amgueddfa Genedlaethol Cymru. Bedyddiwr ydoedd o ran crefydd, ac etholwyd ef yn llywydd Undeb Bedyddwyr Cymru yn 1886. Gwnaed ef yn farchog yn 1902, ac yn farwn yn 1912. Bu farw yn ddi-briod 14 Rhagfyr 1927.

Awdur

• Benjamin George Owens

Ffynonellau

• Who's who in Wales, 1921
• South Wales Daily News, 15 Rhagfyr 1927
• The Daily Telegraph, 15 Rhagfyr 1927
• Western Mail, 25 Mehefin 1930
• Seren Cymru, 23 Rhagfyr 1927
• Seren Gomer, 1928, 40
• Adroddiad Undeb Bedyddwyr Cymru, 1886

Darllen Pellach

• T. Marchant Williams, Welsh Members of Parliament, 1894 (Cardiff 1894)
• Archifau LlGC: General Election 1906 Wales and Monmouthshire. A Souvenir containing photographs, biographical sketches etc., of all the Welsh MP's: Sir Alfred Thomas
• Erthygl Wicipedia: Alfred Thomas

Delweddau

• National Portrait Gallery: Alfred Thomas, 1st Baron Pontypridd

Dolenni Ychwanegol

• Wikidata: Q4723516

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/