THOMAS, JOHN (1760 - 1849), gweinidog gyda'r Methodistiaid Calfinaidd;

Ganwyd ym mhlwyf y Ferwig, Sir Aberteifi. Ychydig o fanteision a gafodd ym more oes; priododd yn ieuanc a chafodd deulu lluosog. Ymunodd â'r Bedyddwyr yn 1775, ond troes at y Methodistiaid yn 1779. Ymfudodd i Lundain i ddilyn ei grefft o ddilledydd; ymunodd yno ag eglwys Wilderness Row ond gwrandawai'n gyson ar yr enwog William Romaine. Dychwelodd i dref Aberteifi a dechreuodd bregethu c. 1795. Dewiswyd ef i'w neilltuo yn ordeiniad cyntaf y Methodistiaid yn Llandeilo Fawr, 1811. Pregethai'n llym, ond yn rhagorol iawn; cyhoeddwyd cyfrol o'i bregethau ar ôl ei farw. Bu farw 3 Chwefror 1849 - yr olaf o urddedigion 1811.

Awdur

• Y Parchedig Gomer Morgan Roberts, (1904 - 1993)

Ffynonellau

• T. Phillips, Cofiant yn ghyda phigion o bregethau ac anerchiadau y diweddar Barch. John Thomas o Aberteifi (Aberystwyth 1851)
• Methodistiaeth Cymru (1851–6), ii, 103
• Joseph Evans, Biographical Dictionary of Ministers and Preachers of the Welsh Calvinistic Methodist Body … to the close of the year 1850 (1907), 295
• John Evans, Byr-gofiant am naw a deugain o Weinidogion Ymadawedig sir Aberteifi (Dolgellau 1894), 171
• J.M. Jones, Ordeiniad 1811 ymysg y Methodistiaid Calfinaidd (1911), 193

Dolenni Ychwanegol

• Wikidata: Q20804732

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/