THOMAS, MICAH (1778 - 1853), gweinidog ac athro gyda'r Bedyddwyr

Ganwyd 19 Chwefror 1778 yn Whitson yn sir Fynwy, yn fab i ffermwr a oedd yn aelod o eglwys Annibynnol New Inn. Symudodd ei rieni i Langybi (Llangibby), a bu yntau dan addysg yn Nhre-rhedyn ac wedyn yn y Trosnant, Pontypŵl. Ymunodd â Bedyddwyr Penygarn; dechreuodd bregethu yn 1796; aeth i academi'r Bedyddwyr ym Mryste yn Chwefror 1801; ac urddwyd ef yn Ryeford (sir Henffordd), 19 Medi 1802. Yn Ionawr 1807 aeth i'r Fenni, i wneuthur gwaith mawr ei fywyd fel llywydd academi'r Bedyddwyr yno (a agorwyd yn 1807 ac a symudwyd i Bontypŵl pan ymddiswyddodd ef yn 1836) a gweinidog eglwys Saesneg y Bedyddwyr yn Frogmore Street.

Priododd ddwywaith; ei wraig gyntaf oedd Sophia Wall, o Ross; ei ail wraig oedd Rachel, ferch John Harris o'r Gyfeilon ac ŵyres Morgan Harry, gweinidog Blaenau Gwent.

Dyn defosiynol, ysgolheigaidd, cryf ei ewyllys, oedd Micah Thomas. Cwynid arno fel gweinydd ac fel disgyblwr, ac amheuid a oedd yn Galfin uniongred; ond ni fennodd hynny ddim arno. Yn y diwedd, dug farn i fuddugoliaeth, a chydnabyddid pwysigrwydd ei waith â diolch. O'r cant a thri a fu dan ei addysg y daeth penaethiaid cyntaf tri choleg y Bedyddwyr, ym Mhontypŵl, Hwlffordd, a Llangollen.

Bu farw 28 Tachwedd 1853.

Awdur

• Y Parchedig Edward William Price Evans, (1887 - 1972)

Ffynonellau

• Seren Gomer, 1854 a 1855
• Josiah Thomas Jones, Geiriadur Bywgraffyddol o Enwogion Cymru (Aberdâr 1867-70), ii, 595

Dolenni Ychwanegol

• Wikidata: Q20748860

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/