TUDOR, OWEN DAVIES (1818 - 1887), awdur llyfrau ar y gyfraith

Ganwyd 19 Gorffennaf 1818 yn Lower Garth, Cegidfa, mab hynaf Robert Owen Tudor, capten yn y Royal Montgomeryshire Militia, a'i wraig Emma, merch John Lloyd Jones, Maesmawr, Sir Drefaldwyn. Cafodd ei addysg yn ysgol Amwythig. Fe'i derbyniwyd i'r Middle Temple fis Ebrill 1839, a daeth yn fargyfreithiwr ym Mehefin 1842. Bu'n dilyn ei alwedigaeth yn Llundain am flynyddoedd lawer ac yna cafodd ei ddewis yn gyd-gofrestrydd Llys y Methdaliadau yn Birmingham; ymddeolodd yn 1872. Yr oedd yn adnabyddus fel awdur llyfrau ar y gyfraith - A Treatise on the Law of Charitable Trusts, Leading Cases in the Law of Real Property and Conveyancing, a Leading Cases in Mercantile and Maritime Law. Priododd, fis Medi 1849, â Sarah Maria, ferch David James, ficer Llanwnog, Sir Drefaldwyn, a bu iddynt ddau fab a dwy ferch. Bu farw 14 Tachwedd 1887, a chladdwyd ef yn y Brompton Cemetery, Llundain.

Awdur

• Syr William Llewelyn Davies, (1887 - 1952)

Ffynonellau

• R. Williams, Montgomeryshire Worthies (1894)

Dolenni Ychwanegol

• Wikidata: Q20748864

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/