WAITHMAN, ROBERT (1764 - 1833), arglwydd faer Llundain

Ganwyd yn Wrecsam, 1764, mab John Waithman (o Warton, Swydd Gaerhirfryn), saer coed yn gweithio yn ffwrnais Bersham, Wrecsam, a'i wraig Mary (Roberts). Bu'n gwasnaethu mewn siop gwerthwr nwyddau lliain yn Llundain; tua 1786 agorodd ei siop ei hun, ar y cyntaf yn Fleet Market ac yna yr 103 a 104 Fleet Street. Priododd, 14 Gorffennaf 1787, â'i gyfnither, Mary Davis. Llwyddodd i ennill cyfoeth mawr. O dan ddylanwad y chwyldro yn Ffrainc daeth i weithio'n gryf dros ddiwygiad radicalaidd. Daeth yn aelod seneddol dros ddinas Llundain yn 1818 ac enillodd y sedd eilwaith yn 1826, gan ei chadw hyd ei farw. Bu'n siryf Llundain a Middlesex yn 1820 ac yn arglwydd faer yn 1823. Bu farw 6 Chwefror 1833 yn Woburn Place, a chladdwyd ef yn eglwys S. Brides, Fleet Street.

Awdur

• Yr Athro Emeritus David Williams, (1900 - 1978)

Ffynonellau

• Oxford Dictionary of National Biography
• Robert Williams, Enwogion Cymru. A Biographical Dictionary of Eminent Welshmen (1852)
• A. N. Palmer, The History of the Parish Church of Wrexham. Being the second part of "A History of the Town and Parish of Wrexham." (Wrecsam 1886), 1886
• The Satirist, or Monthly Meteor (Llundain 1808-14), 1809 a 1810 (yn cynnwys llu o ymosodiadau arno)

Dolenni Ychwanegol

• VIAF: 48295336
• Wikidata: Q7350786

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/