WILIAM PENLLYN (fl. c. 1550-1570), pencerdd telyn

Cynhwysir ei enw ymhlith telynorion talaith Aberffraw yn rhestr Peniarth MS 147 (203), a graddiodd yn bencerdd (ac athro Peniarth MS 144 (267)) yn eisteddfod Caerwys, 1568. Yn llawysgrif plas Moelyrch (Peniarth MS 103 (66)) ceir nodyn yn ei law ef ei hun yn dweud iddo glera yno 'pan oedd y Nadolig ar ddydd Gwener' yng nghwmni Huw Dai, Robert ap Siôn Llwyd, Wiliam Penfro, Wiliam Goch Grythor, Wmffre Grythor, Morus Grythor, Tomas Grythor o Gegidfa, a Hywel Gethin, telynorion a chrythorion. (Yr oedd y Nadolig ar ddydd Gwener yn 1551, 1556, a 1562.) Canodd englynion i Lewis Gwynn, cwnstabl Trefesgob (bu farw 1552) (Peniarth MS 114 (109)), a Gruffudd Dwnn (Llanstephan MS 433 (881)). Ceir copi o'i gerddlyfr yn llaw Robert ap Huw, Bodwigan, Môn (B.M. Add. MS. 14905). Yn ychwanegol at y cyfeiriadau uchod gweler Bodewryd MS 2B (313); Cardiff MS. 7 (252), B.M. Add. MS. 14998 (32); NLW MS 5247C .

Awdur

• Yr Athro David James Bowen

Ffynonellau

• Henry Lewis (gol.), Musica neu Beroriaeth, the Music of the Britons … transcribed by Robert ap Huw … from the original by William Penllyn (B.M. Additional MS. 14905) (Caerdydd 1936) (Additional Manuscript in the British Museum 14905)

Dolenni Ychwanegol

• Wikidata: Q20734569

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/