WILLIAMS, GRIFFITH (1824 - 1881), gweinidog gyda'r Methodistiaid Calfinaidd, ac awdur

Ganwyd yn Nolwyddelan yn 1824, yn fab i Griffith ac Elin Williams, symudodd y teulu'n fuan i Flaenau Ffestiniog. Heb unrhyw addysg ond addysg yr ysgol Sul, aeth i weithio yn y chwarel.

Tyfodd yn areithydd cymeradwy ar ddirwest; dechreuodd bregethu (1848), ac o 1849 hyd 1853 bu yng Ngholeg y Bala. Aeth wedyn i gadw ysgol ddyddiol yn Llanarmon Dyffryn Ceiriog ond yn 1855 symudodd i Dalsarnau i briodi (cafodd deulu niferus) ac i gadw siop. Ordeiniwyd ef yn 1857.

Cofir ef yn bennaf am ei ffraethineb dihysbydd. Sgrifennai hefyd yn ddiddorol iawn yn y cyfnodolion, a chyhoeddodd dri llyfr: Cofiant y Parch. Richard Humphreys, Dyffryn , 1873; Yr Hynod William Ellis, Maentwrog , 1875 (hanes hen flaenor); a Bwthyn fy Nhaid Oliver, 1880, ail arg. 1904. Bu farw 23 Hydref 1881, a chladdwyd ym mynwent capel y Methodistiaid Calfinaidd, Dyffryn Ardudwy.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• Robert Owen (Pennal), Cofiant a phregethau y Parch. Griffith Williams, Talsarnau (Bala 1886)

Delweddau

• John Thomas, Revd Griffith Williams, Talsarnau (1824-81)

Gweithiau

• Griffith Williams, Cofiant am y Parch. Richard Humphreys, Dyffryn yn nghyda chasgliad o'i bregethau a'i draethodau (Wrecsam 1873)

Dolenni Ychwanegol

• VIAF: 156365324
• Wikidata: Q20804709

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/