WILLIAMS, JOHN ('Ioan ap Ioan'; 1800 - 1871), gweinidog gyda'r Bedyddwyr, ac awdur

Ganwyd yn y Trwyn-swch, Llanddoged, 1800, yn fab i John a Jane Williams, hyhi'n aelod gyda'r Bedyddwyr yn Llanrwst. Bedyddiwyd yntau yn Llanrwst, a dechreuodd bregethu 'n 25 oed yn y Cefnbychan, lle'r oedd ar y pryd yn cadw ysgol. Bu'n fyfyriwr yn y Fenni, 1828-31 a threuliodd rai misoedd ar brawf ym Mhenrhyncoch, ond o Aberduar y derbyniodd alwad, ac yno y bu weddill ei oes, o'i ordeinio, 29-30 Tachwedd, 1831, hyd ei farwolaeth 31 Rhagfyr 1871. Priododd yn Aberduar 13 Awst 1841, ag Eleanor Hughes, merch D. Hughes, Glandyforiog, Llanybyddair, a ganed iddynt ddau fab a phedair merch. Yn Aberduar hefyd y claddwyd ef. Gafodd weinidog aeth lwyddiannus - helaethwyd capel Aberduar, o fewn tair blynedd i'w ddyfodiad yno, a daeth yn boblogaidd drwy'r wlad yn rhinwedd ei ffraethineb a'i huodledd, ond erbyn heddiw fel bardd a chofiannydd y cofir amdano yn bennaf. Cyhoeddodd (1) Lloffyn y Prydydd , 1839, yn y mesurau caeth a rhydd, yn cynnwys cerddi ar destunau Beiblaidd, cymdeithasol, a lleol ynghyda marwnadau; (2) Cofiant … Dafydd Saunders, Merthyr, 1842; (3) Cofiant y Parch John Jones, Llandyssil , 1859; a (4) chofiant Benjamin Thomas, gweinidog y Bedyddwyr, Penrhiwgoch, yn Seren Gomer, 1860. Cyhoeddwyd cofiant iddo yntau gan J. Davies, Llandyssul, yn 1874.

Awdur

• Benjamin George Owens

Ffynonellau

• John Davies, Cofiant y Parch John Williams ("I. ab Ioan"), Aberduar (Caerfyrddin 1874)
• Seren Gomer, 1840, 341; 1841, 286; 1860, 97
• Greal y Bedyddwyr, 1832, 56
• Seren Cymru, 5 a 12 Ionwar 1872
• David Jones, Hanes y Bedyddwyr yn Neheubarth Cymru (1839), 334
• Baptist Handbook, 1873
• J. Rufus Williams, Hanes Athrofeydd y Bedyddwyr yn Sir Fynwy yn nghyd â byr grybwylliad am athrofeydd Hwlffordd a Llangollen (Aberdâr 1863), 35
• Y Geninen, 1896, 219

Dolenni Ychwanegol

• Wikidata: Q28361538

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/