WILLIAMS, MATTHEW (bu farw 1801), actiwr

Ganwyd yn y Trallwng, Sir Drefaldwyn, tua chanol y 18fed ganrif. Golygid iddo fyned i fusnes gwerthu sidan, eithr ymddangosodd am y tro cyntaf fel actiwr yn y Birmingham New Theatre yng nghymeriad Hamlet ar 27 Gorffennaf 1778. Oddi yno aeth at y Bath Company, ac, yn 1779, ymunodd (am gyflog o £5 yr wythnos) a'r rhai a oedd yn chwarae yn Drury Lane Llundain. Yn 1790 priododd a Mrs. Wilson, o Lewes, Sussex, aelod o gwmni Drury Lane, Cymerodd y Shakespeare Coffee House yn Bow Street, Llundain, drosodd, a phan orffennodd gyda chwmni Drury Lane cyflogwyd ef i gymryd gofal y Richmond Theatre. Wedi i'w wraig farw aeth i India'r Gorllewin lle y bu farw yn 1801. Dywedir fod llinellau Anthony Pasquin i ' Mr. Williames ' yn cyfeirio ato ef; pwysleisir ynddynt allu Williams fel actiwr, ei swildod, a'i lais melysber.

Awdur

• Cecil John Layton Price, (1915 - 1991)

Ffynonellau

• M. Charles Jones, 'Welshpool,' yn Collections Historical and Archaeological relating to Montgomeryshire, xiv, 199-200
• The Thespian Dictionary (London 1805)
• John Williams,'Anthony Pasquin', The Children of Thespis (London 1792), 82
• Yn ôl R. Williams, Montgomeryshire Worthies (1894), bu farw mewn gornest, yn Llundain, â'i gydactiwr Quinn

Dolenni Ychwanegol

• Wikidata: Q20733899

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/