WILLIAMS, DAFYDD RHYS ('Index '; 1851 - 1931), llenor a newyddiadurwr

Ganwyd 8 Mai 1851 yn Tai Hywel o'r Llwyn, Cefn Coed y Cymer, sir Frycheiniog, mab i borthmon. Yn 13 oed aeth i weithio o dan y ddaear. Dechreuodd gystadlu mewn eisteddfodau, gan ennill ar ddrama yn Aberdâr ac ar bryddest yn Treherbert. Parodd cyfres o erthyglau a ysgrifennodd i'r Gwladgarwr (Aberdâr) ar ' Beirdd a barddoniaeth ' gryn gyffro ymysg y beirdd. Yn 1878 aeth i Lundain lle y parhaodd i gystadlu; enillodd yn eisteddfod Capel Jewin ar bryddest, a bu'n llwyddiannus yn eisteddfodau cenedlaethol Merthyr Tydfil a Dinbych hefyd. Ymfudodd i U.D.A. yn 1883. Ymsefydlodd yn Brooklyn, Ohio. Enillodd amryw wobrwyon yn eisteddfodau America, e.e. yn eisteddfod Ffair Fawr y Byd, Chicago, 1893. Ym mis Mai 1897 aeth i Utica i olygu Y Drych, gan barhau'n olygydd y newyddiadur hyd nes y bu farw yn 1931. Ymysg yr amryw lyfrau a gyhoeddodd yr oedd Rhwng Gwg a Gwen, 1903, Am Dro i Erstalwm, 1905?, Llyfr y Pedair Dameg, 1907?, Llyfr Pawb, 1908?, Llyfr y Ddau Brawf, 1911?, Llyfr y Ddau Adda, 1919. Bu farw 4 Mawrth 1931 yn Cefn Coed y Cymer.

Awdur

• Robert (Bob) Owen, (1885 - 1962)

Ffynonellau

• Y Drych (Utica), 24 Mawrth 1921, 19 a 26 Mawrth 1931, 18 Chwefror 1932

Dolenni Ychwanegol

• Wikidata: Q28361685

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/