WILLIAMS, THOMAS (Soranus, 1818-1865), meddyg a gwyddonydd

Ganwyd yn 1818 yn fab i'r Parch. John Williams, ficer Llandyfrïog, Ceredigion. Aeth i Lundain i astudio meddygiaeth; enillodd wobr y R.C.S. yn 1843 am draethawd ' The Structure and Functions of the Lungs '; cafodd ei M.D. yn 1845. Wedi bod am amser yn ddarlithydd mewn anatomeg yn Guy's Hospital, ymsefydlodd yn Abertawe fel meddyg, a daeth i fri mawr yno. Ar hyd y cyfnod o 1841 hyd 1858 bu'n cyfrannu papurau i gylchgronau meddygol a gwyddonol yn Llundain. Cyhoeddodd yn Abertawe ddau bamffled, A Sketch of the Relation … between the Three Kingdoms of Nature, 1844, a The Science and Scientific Men of Wales, 1855, heblaw adroddiad (1854) ar effeithiau mwg y gweithfeydd copr. Etholwyd ef yn F.R.S. yn 1858. Bu farw 23 Mai 1865.

JOHN ROBERT WILLIAMS (bu farw 1852), offeiriad

Brawd Thomas Williams. Offeiriad cyntaf yr eglwys Gymraeg a sefydlwyd yn Ely Place, Llundain, yn 1843, trwy ymdrechion ail Gymdeithas y Cymmrodorion. Ymfudodd i America, a bu farw yn New York yn 1852.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• Llawysgrif Ceitho yn Llyfrgell Genedlaethol Cymru yn Ll.G.C. (ar y ddau frawd)
• Trafodion Anrhydeddus Gymdeithas y Cymmrodorion, 1932-3, ar Thomas Williams, gyda rhestr o'i bapurau

Dolenni Ychwanegol

• Wikidata: Q21166419

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/