GOULD, ARTHUR JOSEPH (1864-1919), chwaraewr pêl droed (Rygbi)

Ganwyd yng Nghasnewydd 10 Hydref 1864, yn un o deulu nodedig mewn mabolgampau a chyda'r bêl droed - bu yntau'n chwarae dros Gasnewydd mor gynnar â'r 16 oed; ac o hynny hyd 1898 daliodd ati. Cefnwr oedd ar y cychwyn - bu'n gefnwr dros Gasnewydd am dri thymor, ac fel cefnwr y cafodd ei ' gap ' cyntaf dros Gymru. Ond fel canolwr y daeth yn wir enwog. Bu'n cynrychioli Cymru gynifer â 27 o weithiau, rhwng 1885 a 1897. Yr oedd yn hynod chwim ei droed, ac yn sgoriwr uchel - am gryn amser, ganddo ef yr oedd y 'record' o 44 o 'geisiau' mewn un tymor, yn erbyn y clybiau pwysicaf yn y Deheudir. Gyda chlwb Casnewydd y bwriodd y rhan fwyaf o'i yrfa, ond bu hefyd yn chwarae dros Richmond (1886-7) a Middlesex (1887-8). Fel rhedegwr, hefyd, yr oedd iddo fri mawr. Bu farw 2 Ionawr 1919; y mae gwely coffa iddo yn Ysbyty Brenhinol Gwent yng Nghasnewydd.

Brawd (hynaf) iddo oedd ROBERT GOULD (1864? - 1932), blaenwr, a fu'n chwarae dros Gasnewydd o 1879 hyd 1889, ac a gynrychiolodd Gymru 11 o weithiau rwng 1882 a 1887; bu farw 29 Rhagfyr 1932.

Awdur

• Dr Moelwyn Idwal Williams

Ffynonellau

• W. J. T. Collins, Rugby Recollections (1948), 9-10
• The Times, 3 Ionawr 1919
• Western Mail, 3 Ionawr 1919

Darllen Pellach

• Carolyn Hitt, Arthur Gould, the first true celebrity face of Welsh rugby, Western Mail, 5 Ionawr 2019
• Erthygl Wicipedia: Arthur Gould

Dolenni Ychwanegol

• VIAF: 305410748
• Wikidata: Q1403116

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/