GRIFFITH-JONES, EBENEZER (1860 - 1942), gweinidog Annibynnol a phrifathro

Ganwyd yn Merthyr Tydfil, 5 Chwefror 1860, mab y Parch. E. Ayron a Mary Ann Jones. Cafodd bob manteision addysg yn ei ieuenctid. Priodolai ei ddiwylliant yn bennaf i ddylanwad ei dad. Bu yn ysgol ramadeg Castell Newydd Emlyn, yng ngholeg Caerfyrddin, 1875-78, yn athro cynorthwyol yn Abertawe, 1879-80; ac yn New College a Phrifysgol Llundain, 1880-85, pryd yr enillod amryw wobrau ac ysgoloriaethau. Graddiodd yn B.A. (Llundain) yn 1882. Bu'n weinidog S. John's Wood, 1885-87; Park Chapel, Llanelli, 1887-90; Stroud Green, 1890-98; Balham, 1898-1907; prifathro'r Yorkshire United Independent College, Bradford, 1907-32; ac yna yn ôl i Gymru a chymryd gofal yr eglwys Annibynnol Saesneg yn Llandeilo, 1932-6. Anrhydeddwyd ef â gradd D.D. gan Brifysgol Caeredin. Bu'n gadeirydd Undeb Annibynwyr Lloegr a Chymru a Llywydd Cyngor yr Eglwysi Rhyddion. Ysgrifennodd The Ascent through Christ 1899, Providence (2 vols.), The Master and His Method 1903, The Economics of Jesus 1904, The Dominion of Man 1926 &c. a llu o erthyglau mewn cylchgronau diwinyddol ac athronyddol. Anghydffurfiwr cadarn ac anhyblyg ei farn, dadleuwr pybyr ar faterion diwinyddol a chyhoeddus. Priododd Carita (marw 1936), merch T. F. Stoner, Elstree, a bu iddynt ddau o blant. Bu farw 22 Mawrth 1942.

Awdur

• Y Parchedig John Dyfnallt Owen, (1873 - 1956)

Ffynonellau

• Hanes Eglwysi Annibynnol Cymru v. 342
• The Congregational Year Book, 1942
• Walter J. Evans, NLW MS 10328B: Carmarthen Presbyterian College roll of students
• E. Pan Jones, Oriel Coleg Presbyteraidd, Caerfyrddin: yn cynwys hanes yr holl fyfyrwyr fu yn y coleg o 1796 hyd 1899 (Merthyr Tydfil 1909)
• Who's who?, 1941
• Who was who?, 1941-50

Dolenni Ychwanegol

• Wikidata: Q20746788

Dyddiad cyhoeddi: 1970

Hawlfraint Erthygl: http://rightsstatements.org/page/InC/1.0/