IRBY, GEORGE FLORANCE, 6ed barwn BOSTON (1860 - 1941), tirfeddiannwr a gwyddonydd

Ganwyd 6 Medi 1860, mab hynaf Florance George Irby, 5ed barwn Boston, ac Augusta Caroline, merch y 3ydd Barwn de Saumarez. Addysgwyd ef yn Eton a choleg Eglwys Crist, Rhydychen, lle y graddiodd gydag anrhydedd mewn hanes ddiweddar yn 1882. O 1885 hyd 1886 yr oedd yn ' lord-in-waiting ' i'r Frenhines Victoria. Perchenogai stadau yn swyddi Lincoln a Buckingham ac hefyd yn Lligwy, Môn. Trwy gydol ei fywyd treuliodd lawer o'i oriau hamdden i astudio rhai canghennau o'r gwyddorau anianol, yn arbennig seryddiaeth, botaneg ac entomoleg, ac yr oedd yn Gymrawd o Gymdeithas yr Hynafiaethwyr ac o Gymdeithas Ddaeareg Llundain. Efo oedd llywydd Cymdeithas Hynafiaethol Môn o adeg ei sefydlu yn 1912 hyd o fewn ychydig i'w farw, ac yn ystod y cyfnod hwn bu'n gefn i bob gweithgaredd archaeolegol ym Môn a'r siroedd cyfagos - yn Lligwy ei hun pan archwiliwyd olion hen bentref Prydeinig yno o'r cyfnod Rhufeinig, ac hefyd yng Nghaer Saint (Segontium) a Chaerhun (Conovium). Yn 1936 cyflwynwyd iddo radd LL.D. er anrhydedd gan Brifysgol Cymru am ei wasanaeth i ddiwylliant cenedlaethol. Bu farw 16 Medi 1941.

Awdur

• Emyr Gwynne Jones, (1911 - 1972)

Ffynonellau

• The Times, 17 Medi, 1941
• Who's who in Wales (ail arg.)
• Minutes of the Annual Meeting of the Court of Governors of the University College of Wales, held at the College, in Aberystwyth, 21 a 22 Gorffennaf 1936

Dolenni Ychwanegol

• Wikidata: Q5540954

Dyddiad cyhoeddi: 1970

Hawlfraint Erthygl: http://rightsstatements.org/page/InC/1.0/