JEHU, THOMAS JOHN (1871 - 1943), daearegwr

Ganwyd ym Mrynafon, Llanfair-Caereinion, Sir Drefaldwyn, 19 Chwefror 1871. Cafodd ei addysg yn ysgol uwchradd Croesoswallt ac ym mhrifysgolion Caeredin (M.B., C.M., 1893, B.Sc., 1894) a Chaergrawnt (1897-9), a thrachefn yng Nghaeredin (M.D., 1902).

Ei waith ymchwil pwysig cyntaf oedd mesur dyfnder llynnoedd Eryri a'r ardaloedd cylchynol; cyhoeddwyd y gwaith hwn gan Gymdeithas Frenhinol Caeredin yn 1902. Dewiswyd ef yn ddarlithydd mewn daeareg ym mhrifysgol S. Andrews, 1903, ac, yn 1914, yn Athro Brenhinol daeareg a mwynyddiaeth ym mhrifysgol Caeredin; cymerodd ran amlwg ym mywyd academig a gwyddonol y ddinas honno.

Rhoes sylw yn gynnar yn ei oes i'r haenau yng Nghymru a adawsid yn Oes yr Ia ac wedi iddo ymsefydlu yng Nghaeredin gwnaeth gyfraniadau pwysig i astudiaeth daeareg Ysgotland, yn arbennig ynglŷn â chreigiau hynaf yr Ucheldiroedd a'r Ynysoedd. Yr oedd yn aelod o'r comisiwn brenhinol ar 'Coast Erosion' (1906), bu'n llywydd Cymdeithas Daeareg Caeredin (1917-18), yn gymrawd ac is-lywydd (1929-32) Cymdeithas Frenhinol Caeredin. Bu farw yng Nghaeredin 18 Gorffennaf 1943.

Awdur

• Frederick John North, (1889 - 1968)

Ffynonellau

• Quarterly Journal of the Geological Society of London, 100, 1944, lxxl-lxxxii
• Year Book of the Royal Society of Edinburgh, 1942-3
• Who's who?
• [gwybodaeth gan C. P. Finlayson, Caeredin ]

Dolenni Ychwanegol

• Wikidata: Q20746844

Dyddiad cyhoeddi: 1970

Hawlfraint Erthygl: http://rightsstatements.org/page/InC/1.0/