JONES, DANIEL EVAN (1860 - 1941), awdur

Ganwyd 22 Medi 1860 yn Soar, Llangeler, Sir Gaerfyrddin, yn fab i John Jones a'i briod, Bargod Villa, Dre-fach. Addysgwyd ef yn yr ysgolion lleol ac academi Pen-rhiw gan y Parch. W. E. Davies. Yn ieuanc bu'n saer maen ac adeiladydd pontydd. Yn ddiweddarach bu'n cadw ffatrïau gwlanen a brethyn yn Nhre-fach, Llandysul a Machen. Meithrinodd dueddiadau llenyddol er yn ieuanc. Yn 1899 cyhoeddodd Hanes Plwyfi Llangeler a Phenboyr, cyfrol a ddengys ymchwil manwl a llafurus. Testun gwobr eisteddfod Dyfed Awst 1897 oedd y llyfr. Enillodd hefyd wobr y Western Mail mewn cystadleuaeth niferus am drosi ' Ar lan Iorddonen ddofn ' i'r Saesneg. Bu farw 18 Awst 1941 yn Llaintarad, Llangeler, yn 80 mlwydd oed, a chladdwyd ei weddillion ym mynwent Penrhiw.

Awdur

• John Evans, (1877 - 1958)

Ffynonellau

• Gwybodaeth bersonol
• [ Yr Ymofynnydd, Tachwedd 1898 ]

Dolenni Ychwanegol

• Wikidata: Q20804668

Dyddiad cyhoeddi: 1970

Hawlfraint Erthygl: http://rightsstatements.org/page/InC-RUU/1.0/