JONES, DAVID JAMES (1886 - 1947), athro athroniaeth

Ganwyd 22 Rhagfyr 1886 yn y Pandy, Pontarddulais, mab William a Jane Jones. Cafodd ei addysg yn ysgol ganolraddol Tregŵyr, coleg y Brifysgol yng Nghaerdydd, a choleg Emmanuel, Caergrawnt; graddiodd yn B.A. (Cymru) gydag anrhydedd yn y dosbarth cyntaf mewn Hebraeg ac athroniaeth, a daeth yn gymrawd o Brifysgol Cymru; cymerodd radd M.A. yn 1912. Ordeiniwyd ef, 1915, yn weinidog gyda'r Methodistiaid Calfinaidd, bu'n gaplan gyda'r fyddin yn Ffrainc yn ystod rhyfel 1914-18, a bu'n weinidog yn Bryn-mawr ac Abertawe. Yn 1928 dewiswyd ef yn diwtor mewn athroniaeth a seicoleg yng ngholeg Harlech; 10 mlynedd yn ddiweddarach etholwyd ef yn athro athroniaeth yng ngholeg Prifysgol Cymru ym Mangor. Priododd 1917, Margaretta Roderick, Gwynfe, Sir Gaerfyrddin.

At y gwres a oedd yn nodweddiadol o'i bregethu fe ychwanegwyd yn ddiweddarach, yn rhinwedd ei ymladd hir yn erbyn afiechyd, ddoethineb aeddfed, llonyddwch, urddas, a thynerwch - y cwbl hyn yn ei wneuthur yn athro nodedig. Yn ei athroniaeth ceisiai gael safbwynt y gwyddonydd i gydfynd â safbwynt y Cristion. Ysgrifen nodd erthygl i Harlech Studies, 1938, o dan y teitl ' Nodiadau ar y Method Gwyddonol '; y mae erthyglau ganddo hefyd yn Y Traethodydd a'r Efrydiau Athronyddol. Cyhoeddodd yn 1939, Hanes Athroniaeth: Y Cyfnod Groegaidd, gwaith sydd yn astudiaeth dreiddiol o leddwl y Groegiaid. Bu farw 23 Gorffennaf 1947 a chladdwyd ef ym Mangor.

Awdur

• Yr Athro Richard Ithamar Aaron, (1901 - 1987)

Ffynonellau

• Marw-gofion yn Efrydiau Athronyddol, 1947,
• a'r Y Goleuad, 13 Awst 1947

Darllen Pellach

• Erthygl Wicipedia: David James Jones

Dolenni Ychwanegol

• Wikidata: Q5235575

Dyddiad cyhoeddi: 1970

Hawlfraint Erthygl: http://rightsstatements.org/page/InC/1.0/