JONES, THOMAS LLECHID (1867 - 1946), offeiriad, llenor, a llyfryddwr

Ganwyd 4 Rhagfyr 1867, yn y Tyddyn Uchaf, Llanllechid, Sir Gaernarfon, yn fab i Hugh Jones a Catherine ei wraig. Cafodd ei addysg yng ngholeg y Brifysgol, Bangor, a choleg Dewi Sant, Llanbedr-Pont-Steffan. Wedi iddo raddio (B.A., yn 1896) yng ngholeg Dewi Sant ordeiniwyd ef (1897) i guradiaeth eglwys S.David, Blaenau Ffestiniog; daeth yn offeiriad yn 1899. Yn 1902 daeth yn gurad Llanllyfni, Sir Gaernarfon, yn 1906 cafodd ficeriaeth Ysbyty Ifan, ac, yn 1915, ficeriaeth Llysfaen; cafodd ei wneuthur yn rheithor Llangynhafal (gyda Llangwyfan) yn 1934. Priododd 9 Ionawr 1917, Elizabeth Dolben Jones. Ymneilltuodd yn 1944 a mynd i fyw ym Mae Colwyn lle y bu farw 12 Awst 1946.

Cyfrannodd Llechid Jones i gylchgronau'r Eglwys yng Nghymru - Yr Haul, Y Llan, etc. Yr oedd yn un o aelodau mwyaf selog Cymdeithas Lyfryddol Cymru a daeth yn un o'r Is-Lywyddion. Ysgrifennodd lawer ar faterion llenyddol a llyfryddol i Gylchgrawn y gymdeithas; gweler enghreifftiau yng Nghyfrolau iii, iv, v a vi, a noder, yn arbennig, ei bum erthygl a deitlir yn ' Studies in Welsh Book Land '. Yr oedd yn llyfryddwr gofalus a chynullodd lyfrgell breifat dda; aeth enghreifftiau o'i lyfrau a'i lawysgrifau i Lyfrgell U.C.N.W., Bangor, a rhai i'r Llyfrgell Genedlaethol. Efallai mai ei waith pwysicaf ar gyfer yr eisteddfod genedlaethol oedd traethawd (1933) ar hanes y Pabyddion yng Nghymru yn yr ail-ganrif-ar-bymtheg.

Awdur

• Syr William Llewelyn Davies, (1887 - 1952)

Ffynonellau

• Crockford's Clerical Directory, 1941
• North Wales Weekly News, 15 Awst 1946
• Cylchgrawn y Gymdeithas Lyfryddol; vi. 215-6
• Who's who in Wales, 1937

Delweddau

• LlGC: Richard, brother of Llechid Jones, Llyfr Ffoto T Llechid Jones Album, 18r.

Dolenni Ychwanegol

• LlGC: Llyfr Ffoto T Llechid Jones Album
• Wikidata: Q20821448

Dyddiad cyhoeddi: 1970

Hawlfraint Erthygl: http://rightsstatements.org/page/InC-RUU/1.0/