WILLIAMS, THOMAS RHONDDA (1860 - 1945), gweinidog gyda'r Annibynwyr

Ganwyd yn y Bont-faen 19 Mehefin 1860 yn un o dri o feibion Thomas Williams gweinidog gyda'r Methodistiaid Calfinaidd, a aeth i'r weinidogaeth, dau ohonynt gyda'r Annibynwyr, ac un gyda'r M.C. Derbyniwyd ef i goleg Caerfyrddin fel Thomas Rees Williams yn 1877. Bu'n weinidog ym Methania, Dowlais (1880), Gnoll Road, Castell Nedd (1884), Greenfield, Bradford (1888), a'r Union Chapel, Brighton (1909). Ymddeolodd yn 1931, gan fyw weddill ei oes yn Hove, lle y bu farw 21 Tachwedd 1945.

Cyhoeddodd amryw lyfrau. Ystyrid ef yn bregethwr blaengar, a chefnogai'r 'Ddiwinyddiaeth Newydd' yr oedd cymaint sôn amdani tua throad y ganrif. Yn 1930 traddododd y bregeth i gymanfa Cynghrair y Cenhedloedd yn Genefa. Cyflwynwyd iddo radd D.D. gan seminari ddiwinyddol Chicago. Efe oedd cadeirydd Undeb Cynulleidfaol Lloegr a Chymru yn 1929.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• E. Pan Jones, Oriel Coleg Presbyteraidd, Caerfyrddin: yn cynwys hanes yr holl fyfyrwyr fu yn y coleg o 1796 hyd 1899 (Merthyr Tydfil 1909)
• Who's who in Wales, 1920
• The Congregational Year Book, 1946

Dolenni Ychwanegol

• Wikidata: Q20821227

Dyddiad cyhoeddi: 1970

Hawlfraint Erthygl: http://rightsstatements.org/page/InC/1.0/