BEDLOE, WILLIAM (1650 - 1680), anturiaethwr a hysbyswr ynglyn â'r Cynllwyn Pabaidd

Ganwyd yng Nghas-gwent, sir Fynwy. Bu'n lleidr yn Lloegr ac yna'n dwyllwr ar y cyfandir, ac ar ôl ysbaid mewn carchar yn Valladolid, llwyddodd yn y gamp anodd o ddwyn arian oddi ar Titus Oates. Ym mis Hydref 1678, ar derfyn chwe mis o garchariad yn Newgate, cychwynnodd ar yrfa eithriadol o lwyddiannus fel hysbyswr drwy honni y medrai ddatguddio'r gwir ynglyn â llofruddiad Syr Edmund Berry Godfrey. Bu'n dyst yn erbyn dros ddeuddeg o offeiriaid, a chyhuddodd hyd yn oed y frenhines, Catherine o Braganza, o gynllwynio i lofruddio'r brenin. Bu farw ym Mryste 20 Awst 1680. Honnai un o'i gyfoeswyr fod ganddo fwy o ddychymyg ac o huotledd nag Oates, a'i fod gystal ag ef fel celwyddgi ac anudonwr.

Awdur

• John Martin Cleary

Ffynonellau

• Catholic Record Society, xlvii, xlviii
• Oxford Dictionary of National Biography
• J. Pollock, The Popish Plot. A study in the history of the reign of Charles II

Dolenni Ychwanegol

• VIAF: 10185436
• Wikidata: Q8005312

Dyddiad cyhoeddi: 1970

Hawlfraint Erthygl: http://rightsstatements.org/page/InC/1.0/