RICHARDS, THOMAS (1859 - 1931), aelod seneddol ac ysgrifennydd ffederasiwn glöwyr de Cymru

Ganwyd 8 Mehefin 1859 yn y Cendl, Glyn Ebwy, sir Fynwy, yn fab i Thomas a Mary Richards. Addysgwyd ef yn ysgol Brydeinig y Cendl, a dechreuodd weithio mewn pwll glo pan oedd yn ddeuddeg oed. Chwaraeodd ran amlwg yng ngwaith undebau'r glöwyr yn ardal Glyn Ebwy, a bu'n aelod o'r ' Sliding Scale Association '. Etholwyd ef yn aelod o gyngor sir Mynwy yn 1891, a gwnaed ef yn henadur yn 1904 ac yn gadeirydd y cyngor yn 1924. Pan ffurfiwyd ffederasiwn glöwyr de Cymru yn 1898 penodwyd ef yn ysgrifennydd, swydd a ddaliodd hyd ei farw. Etholwyd ef yn aelod seneddol Llafur dros orllewin Mynwy yn 1904 a chynrychiolodd yr etholaeth honno hyd 1918 ac etholaeth Glyn Ebwy o 1918 hyd iddo ymddeol yn 1920. Gwnaed ef yn aelod o'r Cyngor Cyfrin yn 1918. Bu am ryw ddwy flynedd, 1929-1931, yn llywydd ffederasiwn glöwyr Prydain Fawr. Yn 1880 priodasai Elizabeth Eleanor Thomas. Bu farw 7 Tachwedd 1931 a chladdwyd ef ym mynwent Caerdydd.

Awdur

• Griffith Milwyn Griffiths

Ffynonellau

• Who was who?, 1929-40
• Western Mail, 9 Tachwedd 1931
• The Times, 9 Tachwedd 1931
• L. Twiston Davies, Men of Monmouthshire (Caerdydd 1933)
• Ness Edwards, History of the South Wales Miners Federation (Llundain 1938)

Darllen Pellach

• Archifau LlGC: General Election 1906 Wales and Monmouthshire. A Souvenir containing photographs, biographical sketches etc., of all the Welsh MP's: Thomas Richards

Dolenni Ychwanegol

• VIAF: 53677817
• Wikidata: Q7793509

Dyddiad cyhoeddi: 1970

Hawlfraint Erthygl: http://rightsstatements.org/page/InC/1.0/