Fe wnaethoch chi chwilio am Sir William Williams, 1st Baronet, of Gray
Ganwyd 24 Mai 1893 yn Abersychan, Mynwy, ac addysgwyd ef yn ysgol ramadeg Gorllewin Mynwy, Pontypŵl. Yn bymtheg oed enillodd ysgoloriaeth agored Sainton i astudio'r ffidil yn yr Academi Gerdd Frenhinol; bu'n ddisgybl i Hans Wessely ac yn Dresden i Leopold Auer. O 1919 i 1923 bu'n aelod o'r triawd offerynnol a sefydlwyd gan Henry Walford Davies, yng Ngholeg Prifysgol Cymru, Aberystwyth, ac yn 1923 ef oedd blaenwr y Gerddorfa Simffoni Gymreig. Clywodd Henry Wood ef a'i berswadio i ymuno â Cherddorfa Neuadd y Frenhines yn Llundain. Rhwng 1924 ac 1934 bu'n chwarae yno, yn y Tŷ Opera Brenhinol, Covent Garden, a chyda Cherddorfa Simffoni Llundain. O 1927 bu hefyd yn athro ffidil a fiola, ac yn aelod o'r triawd offerynnol yng Ngholeg y Brifysgol yng Nghaerdydd. Dychwelodd yn 1934 i Aberystwyth i ddysgu yn y Coleg yno ac i flaenu pedwarawd offerynnol y Coleg. Yn 1950 penodwyd ef yn diwtor ffidil, cyfansoddi a cherddorfa yng Ngholeg Cerdd a Drama Caerdydd. Cyfansoddodd yn helaeth, yn ganeuon a gweithiau corawl ac offerynnol, gan gynnwys yn 1945 waith comisiwn i Gerddorfa Simffoni Düsseldorf. Priododd Hannah May Reynolds, a bu iddynt ddau fab. Bu farw yng Nghaerdydd 27 Hydref 1965.
Dyddiad cyhoeddi: 1997
Hawlfraint Erthygl: https://creativecommons.org/licenses/by-sa/4.0/
Mae'r Bywgraffiadur Cymreig yn cael ei ddarparu gan Lyfrgell Genedlaethol Cymru a Chanolfan Uwchefrydiau Cymreig a Cheltaidd Prifysgol Cymru. Mae ar gael am ddim ac nid yw'n derbyn cymorth grant. Byddai cyfraniad ariannol yn ein helpu i gynnal a gwella'r wefan er mwyn i ni fedru parhau i gydnabod Cymry sydd wedi gwneud cyfraniad nodedig i fywyd yng Nghymru a thu hwnt.
Ewch i'n tudalen codi arian am ragor o wybodaeth.