DAVIES, TUDOR (1892 - 1958), datganwr

Ganwyd 12 Tachwedd 1892 yn y Cymer, Porth, Rhondda, Morgannwg, pumed mab David a Sarah Davies. Cyn cymryd at yrfa gerddorol bu'n gweithio yn y lofa ac yn ystod rhyfel 1914-18 fel peiriannydd yn y Coleg Cerdd Brenhinol yn Llundain, a bu'n canu opera a chyngherdda yn T.U.A., Canada ac Awstralia. Yn 1922 ymunodd â'r Cwmni Opera Cenedlaethol Prydeinig a pharhaodd gyda'r cwmni hwnnw weddill ei yrfa. Portreadodd Rudolfo gyda'r cwmni yn Llundain yn 1922, ac yn 1924 ef a ganai ran y prif gymeriad yn y perfformiad cyhoeddus cyntaf o Hugh the drover (Vaughan Williams) yn His Majesty's Theatre. Bu hefyd yn brif denor yn Sadler's Wells, 1931-41, a chyda chwmni opera Carl Rosa, 1941-6, ac fel aelod parhaol o'r cwmni yn Sadler's Wells ef a brotreadai'r prif gymeriad yn y perfformiad Saesneg cyntaf o Don Carlos (Verdi) yn 1938. Cafodd ei wahodd i ganu ymhob un o'r prif wyliau cerddorol ym Mhrydain ac yn T.U.A. Yr oedd yn berchen llais ffres a chynnes, a chanai bob amser gydag urddas ac argyhoeddiad. Bu'n recordio rhwng 1925-30, ac y mae'r rhan o The dream of Gerontius (Elgar) a recordiwyd yn eglwys gadeiriol Henffordd yn 1927, gyda'r cyfansoddwr yn arwain, yn enghraifft nodedig o'i arddull. Priododd y soprano Ruth Packer. Bu farw 2 Ebrill 1958.

Awdur

• Huw Williams, (1922 - 2002)

Ffynonellau

• Who was who?
• Cerddoriaeth Cymru, cylchgrawn y Gymdeithas er hyrwyddo Cerddoriaeth Cymru, 3, (1970), 34-5
• Y Ford Gron: Papur Cymru'r byd, Rhagfyr 1934

Darllen Pellach

• Dean Powell, Celebrating WNO’s founder tenor on their 75th Anniversary (cyrchwyd Mai 2021)

Dolenni Ychwanegol

• VIAF: 7573643
• Wikidata: Q7851276

Dyddiad cyhoeddi: 1997

Hawlfraint Erthygl: http://rightsstatements.org/page/InC/1.0/